Qazaqstanda medıatsııa ınstıtýtyn engizý kózdeledi - Zań jobasy
ASTANA. 8 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Medıatsııa týraly» zań jobasyn birinshi oqylymda maquldady. Atalǵan zań jobasy boıynsha elimizde medıatsııa ınstıtýtyn engizý kózdelip otyr.
Atap aıtqanda, elimizdiń 2020 jylǵa deıingi kezeńge arnalǵan quqyqtyq saıasat tujyrymdamasynda azamattyq sot isin júrgizýge qatysýshylardyń quqyqtaryn barynsha iske asyrý, jeke adamnyń buzylǵan quqyqtary men bostandyqtaryn, qoǵam men memleket múddesin ýaqytyly qorǵaý jáne qalpyna keltirý maqsatynda birqatar is-sharalar qamtylǵan bolatyn. Onyń ishinde, jeke quqyqtyq daý-sharlar taraptary arasyndaǵy ymyraǵa qol jetkizýdiń sot jáne sottan tys tártippen qoldanylatyn túrli joldary men ádisterin belgileýge baǵyttalýy múmkin áreketter de kórinis tapqan edi. Osyǵan oraı, zań jobasynda medıatsııa uǵymyn anyqtaý, onyń negizgi qaǵıdattaryn, qoldanylý aıasyn, medıatsııa rásiminiń kepildigin, medıatorlar qyzmetine aqy tóleý jáne belgileý máseleleri qarastyrylady.
«Zań jobasy boıynsha daýlardy jeke qarsylyq aıasynan shyǵaryp, múddeli pikirtalas aıasyna berý kózdeledi. Múddeli azamattar men uıymdarǵa daýlardy sotqa júginbesten, sotqa deıingi satyda qaraý barysynda sheshý is-áreketterin bir júıege keltirý qamtylady. Sottarda qaralatyn isterdiń sany da aıtarlyqtaı azaıatyndyǵy kútilýde. Budan bólek, zań jobasynyń áleýmettik baǵyty da barshylyq. Sebebi, jergilikti qaýymdastyq deńgeıinde paıda bolǵan keıbir janjaldardy medıatsııa arqyly sheshý múmkindigi kózdelip otyr», dedi zań jobasy boıynsha baıandaǵan QR Joǵarǵy sotynyń tóraǵasy Musabek Álimbekov.
Birinshi oqylymda maquldanǵan zań jobasy ekinshi oqylymǵa ázirleý úshin bas komıtetke tapsyryldy.
