Qazaqstanda medavıatsııa tikushaqtary kún saıyn 15-ke deıin shuǵyl shaqyrtýǵa shyqqan
ALMATY. QazAqparat - Táýelsizdik jyldarynda jedel medıtsınalyq járdem jetildirilip, medıtsınalyq avıatsııanyń derbes qyzmeti damydy. Bul týraly Almaty qalasynyń Óńirlik kommýnatsııalar qyzmetiniń onlaın-baspasóz máslıhatynda QR Densaýlyq saqtaý mınıstrliginiń «Ulttyq shuǵyl medıtsınany úılestirý ortalyǵy» ShJQ RMK basqarma tóraǵasynyń orynbasary Ǵumyrbek Aǵybaev málim etti, dep habarlaıdy QazAqparat tilshisi.
Onyń aıtýynsha, medıtsınalyq avıatsııa jumysy patsıentterdi tasymaldaý, betpe-bet konsýltatsııalar júrgizý, qashyqtan medıtsınalyq qyzmetter kórsetý, operatsııalar júrgizýdi uıymdastyrý, donorlyq organdar men bıomaterıaldy tasymaldaý sııaqty baǵyttarda júrgiziledi. Búgingi tańda orta eseppen medıtsınalyq avıatsııa táýligine 15-ke deıin ushýdy júzege asyrady.
Medıtsınalyq avıatsııa múddesinde 24 ushaq jáne 13 tikushaq paıdalanylady. Olardyń bári QR Azamattyq avıatsııa komıtetinde sertıfıkattalǵan.
Negizi qalanǵannan bastap (2011 jyldan bastap) 2021 jylǵy qarasha aralyǵyndaǵy oryndalǵan ushýlar sany 20 481.
Azamattyq avıatsııanyń turaqty reısteriniń áýe kemelerimen beıindi mamandar jergilikti jerlerde betpe-bet konsýltatsııalyq jáne jedel kómek kórsetý úshin 152 ushýdy oryndady.
Donorlyq organdardy alý jáne tasymaldaý úshin 75 ushý júzege asyryldy. Shetelde aýyr halde jatqan Qazaqstan Respýblıkasynyń azamattaryn jáne qandastardy elimizdiń klınıkalaryna tasymaldaý maqsatynda álemniń 24 elinen 92 sheteldik ushýlar oryndaldy.
