Máıittik donorlyqqa berilgen ár kelisim birneshe adamnyń ómirin saqtaýy múmkin — Aıdar Sıtkazın
ASTANA. KAZINFORM — Qazaqstanda máıittik donorlyqty damytý úshin medıtsına jaǵynan barlyq jaǵdaı jasalǵan, alaıda bul salanyń damýyna halyqtyń donorlyq týraly aqparattaný deńgeıiniń tómendigi men azamattardyń kózi tirisinde óz ustanymyn aldyn ala tirkemeýi kedergi bolyp otyr.
Bul týraly OKQ ótken baspasóz májilisinde Transplantatsııany jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyqtyń dırektory Aıdar Sıtkazınov aıtty.
Onyń sózinshe, búginde elimizde transplantatsııa ortalyqtary jumys isteıdi, bilikti mamandar bar jáne transplantatsııalyq úılestirý júıesi jetildirilip keledi. Sondyqtan transplantatsııa jasaýǵa medıtsınanyń múmkindigi jetkilikti.
— Júıeniń mańyzdy tetikteriniń biri — azamattardyń máıittik donorlyqqa kelisetinin nemese kelispeıtinin eGov portaly arqyly aldyn ala kórsetý múmkindigi. Qazirgi tańda bul qyzmetti 172 283 adam paıdalanǵan. Onyń ishinde 16 109 azamat máıittik donorlyqqa kelisim berse, 156 174 adam bas tartqan, — dedi ol.
Sonymen qatar ortalyq basshysy azamattyń kózi tirisinde bergen kelisimi de árdaıym donorlyq rásimniń júzege asýyna kepil bolmaıtynyn atap ótti.
— Qoldanystaǵy zańnama azamattyń kózi tirisinde bildirgen ustanymyn mindetti túrde tekserýdi kózdeıdi. Sonymen qatar medıtsınalyq uıymdar qaıtys bolǵan adamnyń týystarynan da kelisim alady. Eger otbasy qarsy bolsa, medıtsına qyzmetkerleri medıtsınalyq etıka qaǵıdattaryn jáne jaqyndarynyń pikirin qurmetteı otyryp, aǵzalardy alýdy júrgizbeıdi, — dedi ol.
Ortalyq dırektorynyń sózinshe, álemdik tájirıbe máıittik donorlyqty damytý tek ákimshilik sharalarmen shektelmeıtinin kórsetip otyr. Bul rette qoǵamnyń senimi, halyqtyń aqparattanýy jáne ashyq dıalog sheshýshi ról atqarady.
— Máıittik donorlyqqa berilgen árbir kelisim birneshe patsıentke ómir súrýge múmkindik syılaýy múmkin. Sondyqtan Densaýlyq saqtaý mınıstrligi transplantatsııa qyzmetin damytýdy, zańnamany jetildirýdi, transplantatsııalyq úılestirý júıesin nyǵaıtýdy jáne qoǵammen ashyq dıalog júrgizýdi jalǵastyrady. Sebebi árbir statıstıkalyq kórsetkishtiń artynda adam taǵdyry men adam ómiri tur, — dedi ol.
Jalpy Qazaqstanda zamanaýı transplantatsııa qyzmeti iske qosylǵannan beri 3 270 aǵza transplantatsııasy jasaldy. Onyń 2 726-sy nemese 82%-y tiri donorlardyń qatysýymen, al 544-i nemese 18%-y qaıtys bolǵan donorlardyń aǵzalaryn paıdalaný arqyly oryndalǵan.
Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
Aıta óteıik, buǵan deıin Premer-mınıstrdiń orynbasary — mádenıet jáne aqparat mınıstri Aıda Balaeva aǵza donorlyǵyna kelisim beretinin aıtqan edi.
