Qazaqstanda máıitti «soımaı» sot-medıtsınalyq saraptama jasaıtyn tehnologııa qoldanysqa enedi
ASTANA. KAZINFORM – Ádilet mınıstri Erlan Sársembaev Úkimet otyrysynda sot-medıtsınalyq saraptama sharalary dástúr men dinge saı etý úshin kompıýterlik tomografııany qoldanýdy usyndy.
- «Vırtýaldy aýtopsııany» engizý josparlanyp otyr. Bul – qaıtys bolǵandarǵa sot-medıtsınalyq zertteýler júrgizý úshin kompıýterlik tomografııany qoldaný. Zertteý máıitti kespeı (soımaı) júrgiziledi. Bul ulttyq jáne dinı dástúrlermen qaıshylyqty boldyrmaýǵa kómektesedi, - dedi vedomstvo basshysy.
Sondaı-aq, ol saraptama qyzmetin avtomattandyrý arqyly saraptama júrgizýdiń ashyqtyǵyn arttyrýǵa bolatynyn aıtty.
- Pılot retinde kúrdeli emes eki-úsh saraptamany avtomattandyrýdy josparlap otyrmyz. Jasandy ıntellektti paıdalana otyryp, «E-saraptama 2.0» aqparattyq júıesiniń jańa nusqasyn ázirleý qajet. Sebebi qoldanystaǵy júıe zamanaýı talaptarǵa saı kelmeıdi. Ony basqa aqparattyq júıelermen, jabdyqtarmen biriktirý múmkin emes. Bul zertteýdi júrgizý kezinde sarapshynyń is-áreketin qadaǵalaýǵa, sondaı-aq zertteý kezindegi bolýy múmkin aýytqýlar týraly eskertýge múmkindik beredi. Sarapshynyń is-áreketi men áreketsizdigi jóninde eskertedi. Júıeniń ózinde zertteý júrgizýge jáne «adamnyń qatelikterin» boldyrmaýǵa múmkindik beretin fýnktsııa qarastyrylady, - dedi Erlan Sársembaev.
Aıta keteıik, keıingi úsh jylda notarıýstardyń qyzmeti 28% qymbattaǵan.