Qazaqstanda maınerler salyq tóleýge mindetteledi – Májilis zań jobasyn maquldady
Zań jobasyn Májilis depýtaty, Ekonomıkalyq reforma jáne óńirlik damý komıtetiniń múshesi Ekaterına Smyshlıaeva tanystyrdy.
Onyń aıtýynsha, bul qujattar Memleket basshysynyń tsıfrlyq maınıngti quqyqtyq retteý máseleleri jónindegi tapsyrmalaryn oryndaý úshin ázirlengen. Olardyń basty maqsaty – tsıfrlyq aktıvterdi óndirý men aınalymǵa shyǵarý salasy úshin zańnamalyq negiz qurý.
«Maınerler Qazaqstan ekonomıkasynyń tolyqqandy qatysýshylaryna aınalyp keledi. Buǵan deıin maınıng qyzmetin negizinen bultty qyzmetterde rezıdentter júzege asyryp keldi. Qazaqstan blokcheın ındýstrııasynyń shıkizat beretin qosalqysy retinde paıdalanyldy. Zań jobalary arqyly biz maınerlerdi Qazaqstanda lıtsenzııa alýǵa, ıaǵnı zańdy tulǵalar qurýǵa jáne salyq salýdyń tolyqqandy sýbektileri bolýǵa mindetteımiz», - dedi Ekaterına Smyshlıaeva Májilistiń jalpy otyrysynda.
Depýtattyń aıtýynsha, maınıng-pýldar da ekonomıkanyń bir bóligine aınaldy. Maınerler men maınıng-pýldardyń qyzmetin Tsıfrlandyrý mınıstrligi retteıdi jáne lıtsenzııalaıtyn bolady, al krıptovalıýtany iske asyrý kezeńin «Astana» halyqaralyq qarjy ortalyǵynyń quzireti sheńberinde júrgiziledi dep boljanyp otyr. Osylaısha, Qazaqstannyń qarjy júıesi úshin syn-qaterler alynyp tastalady, óıtkeni Qazaqstanda krıptovalıýta tólem quraly bolyp sanalmaıdy, onyń aınalymyna tyıym salynǵan. AHQO sheńberinde qurylyp jatqan ekojúıede jańa qarjy ınstıtýty – qazaqstandyq krıptobırjalar ashylady.
Tirkelmegen tsıfrlyq aktıvter aınalymyn, onyń ishinde olardy shyǵarý men aıyrbastaýdy retteýdiń erekshe tártibin engizý, sondaı-aq krıptovalıýta aıyrbastaý kezeńinde maınıng kompanııalarynyń halyqaralyq qarjy ortalyǵymen ózara is-qımyl tártibin aıqyndaý usynylady. Budan basqa, zań jobasynda tirkelgen (qamtamasyz etilgen) tsıfrlyq aktıvterdiń túrleri bekitiledi jáne olardyń aınalymynyń tártibi aıqyndalady, ol buǵan deıin Qazaqstan zańnamasynda jazylmaǵan edi.
Mundaǵy basty jańalyqtardyń biri – osy ýaqytqa deıin salyq alańynan tys bolǵan maınerlerge salyq salý. Krıptoındýstrııaǵa salyq salý júıesi birneshe kezeńnen turady: jabdyqty ákelý kezindegi QQS, lıtsenzııa úshin tólem, kılovattqa tsıfrlyq maınıng aqysy, alynǵan syıaqydan korporatıvtik tabys salyǵy, maınıng-pýldaǵy korporatıvtik tabys salyǵy, krıptovalıýtalardaǵy aıyrbastaý aqysy.
Jańa zań jobasy salyq jáne ákimshilik kodeksterdi, «Ruqsattar jáne habarlamalar týraly» jáne «Aqparattandyrý týraly» zańdardy, sondaı-aq «Astana» halyqaralyq qarjy ortalyǵy týraly» Konstıtýtsııalyq zańdy da qozǵaıdy.
Májilistegi talqylaý nátıjesinde «Qazaqstan Respýblıkasynyń tsıfrlyq aktıvteri týraly» zań jobasyn 99 depýtattyń 90-y maqulady, 4 depýtat qalys qaldy.
Foto: inbusiness.kz
