Qazaqstanda maımyl sheshegin juqtyrý jaǵdaılary tirkelgen joq – mınıstrlik

NUR-SULTAN. QazAqparat – Qazaqstanda maımyl sheshegin juqtyrýdyń birde-bir jaǵdaıy tirkelgen joq. Bul týraly QR Densaýlyq saqtaý mınıstrliginen málim etti, dep habarlaıdy QazAqparat.

QR Bas sanıtarlyq dárigeri - Densaýlyq saqtaý vıtse-mınıstri Aıjan Esmaǵambetovanyń aıtýynsha, memlekettik shekara arqyly ótkizý oryndarynda sanıtarlyq-karantındik baqylaý júrgizilip jatyr, onyń ishinde qashyqtan termometrııa bar.

Maımyl sheshegi (monkeypoxes – MPXV) – sırek kezdesetin juqpaly aýrý. Qyzba, jalpy ıntoksıkatsııa jáne ekzantemanyń paıda bolýymen sıpattalady (qyzarý).

Inkýbatsııalyq kezeń – 5-21 kún. Naýqasta dene qyzýynyń joǵarylaýy, deneniń aýyrýy, álsizdik, bórtpe, qusý, lımfa túıinderiniń ulǵaıýy, bas aınalýy baıqalady.

Aýrýdyń uzaqtyǵy 2-3 apta.

Maımyl sheshegi aýrýyn jabaıy janýarlar taratady: prımattar men kemirgishter (tıinder).

Sondaı-aq ınfektsııa naýqastyń qany nemese onyń bıologııalyq suıyqtyǵy arqyly, aýrý janýardyń etin qoldaný saldarynan juǵýy múmkin.

2022 jyldyń 20 mamyrynda Dúnıejúzilik densaýlyq saqtaý mınıstrligi Kongoda jyl basynan beri maımyl shesheginiń 1,2 myń jaǵdaıy tirkelgenin habarlady.

DDU-nyń aldyn ala málimeti boıynsha, Afrıka qurlyǵynan tys álemniń 14 elinde (Ispanııa, Portýgalııa, Ulybrıtanııa, Belgııa, Kanada , Germanııa, Italııa, Avstralııa, Nıderlandy, AQSh , Izraıl, Frantsııa, Shveıtsarııa , Shvetsııa) 110 jaǵdaı anyqtaldy.

QR Bas sanıtarlyq dárigeri jazǵy kanıkýl jáne demalys maýsymynyń bastalýyna oraı shet elderge shyǵatyn qazaqstandyqtar úshin kelesideı keńesin berdi:

1) maımyl shesheginiń órshýi tirkelgen Batys Afrıka elderine (Kongo Demokratııalyq Respýblıkasy, Kongo Respýblıkasy, Kamerýn, Ortalyq Afrıka Respýblıkasy, Nıgerııa, Kot-d ' Ivýar, Lıberııa, Serra-Leone, Gabon jáne Ońtústik Sýdan) barýdan bas tartý (ásirese balalarmen);

2) shet elderge shyqqan jaǵdaıda jabaıy janýarlarǵa (prımattarǵa, kemirgishterge) taıanbaý, beı-bereket saýda oryndarynda jáne kóshede tamaqtanbaý. Tamaqqa tek termııalyq óńdelgen etti (azyq-túlikti) paıdalaný;

3) adamdar kóp jınalatyn oryndarǵa barǵan kezde jeke profılaktıka (qashyqtyq, maskalar, antıseptıkter) sharalaryn paıdalaný. Qol gıgıenasyn saqtaý;

4) saparlardan oralǵannan keıin 3 apta ishinde mazasyzdyq, qyzba, bórtpe (qyzarý, kópirshikter jáne taǵy basqa) baıqalsa – shetelde bolǵanyńyz týraly mindetti túrde habarlaı otyryp, jaqyn mańdaǵy medıtsınalyq mekemege dereý júginý.