Qazaqstanda maıly daqyldardyń egis alqaby 30% ulǵaıdy
ASTANA. KAZINFORM – Óńirlerde egis alqaptaryn ártaraptandyrý jumystary júrip jatyr, dep habarlaıdy QR Aýyl sharýashylyǵy mınıstrliginiń baspasóz qyzmeti.
Ulttyq statıstıka bıýrosynyń derekterine sáıkes, 2026 jyly maıly daqyldar 5 mln 179 myń gektar alqapqa egildi. Bul ótken jylǵy kórsetkishpen salystyrǵanda 30%-ǵa joǵary.
Ásirese, negizgi maıly daqyl sanalatyn kúnbaǵys boıynsha eleýli ósim baıqalady.
Bıyl bul daqyl 2,2 mln gektar jerge egilip, rekordtyq deńgeıge jetti. Bul ótken jylmen salystyrǵanda 25%-ǵa kóp. Osylaısha, sońǵy bes jylda kúnbaǵystyń egis alqaby turaqty ósip, 2021 jylmen salystyrǵanda 2,3 esege ulǵaıdy.
Negizinen Pavlodar, Qostanaı, Aqmola jáne Soltústik Qazaqstan oblystarynda. Bul óńirler egis alqaptarynyń jalpy ósiminiń 90%-yn qamtamasyz etti.
Basqa da maıly daqyldardyń, atap aıtqanda, zyǵyr, raps jáne maqsarynyń egis kólemi de ulǵaıtyldy.
Maıly daqyldardy óńdeýshilerdiń ulttyq qaýymdastyǵynyń málimetinshe, egis alqaptarynyń ulǵaıýyna otandyq óńdeý kásiporyndarynyń maıly shıkizatqa degen joǵary suranysy, sondaı-aq ósimdik maıy men maı ónimderin ótkizýdiń eksporttyq naryqtarynyń keńeıýi sebep bolyp otyr.
Aǵymdaǵy maýsymda qazaqstandyq ósimdik maıy men maı ónimderi 23 elge eksporttalyp jatyr.
Osynyń barlyǵy, Qazaqstandaǵy ósimdik sharýashylyǵyn ártaraptandyrý úderisiniń úzdiksiz qolǵa alynyp jatqanyn jáne aýyl sharýashylyǵy salasy óndirisinde atalǵan daqyldar tobynyń mańyzdylyǵy artyp kele jatqanyn kórsetedi.
-Qazirgi tańda Qazaqstandaǵy maıly daqyldardy óńdeý qýattylyǵy jylyna 5,2 mln tonnadan asady. Onyń ishinde 4,4 mln tonnasy kúnbaǵysqa tıesili. Sonymen qatar 2026–2028 jyldary Qazaqstanda jalpy qýattylyǵy jylyna 3 mln tonnadan astam maıly daqyldy óńdeýge múmkindik beretin jańa maı óńdeý kásiporyndaryn salý boıynsha aýqymdy ınvestıtsııalyq jobalardy iske asyrý josparlanyp otyr,-delingen habarlamada.
Osyǵan deıin maıly daqyldardy qarjylandyrý kólemi 2,6 esega artqany týraly jazdyq.
