Qazaqstanda maıdangerlerge jalpy somasy 7,6 mlrd teńge birjolǵy qarjylaı kómek beriledi

NUR-SULTAN. QazAqparat - Jeńistiń 75 jyldyǵyn merekeleý qarsańynda, 1 025 UOS múgedek qatysýshysy jáne de Jeńiske úles qosqan ózge de azamattar sanatyna jalpy somasy 7,6 mlrd teńgege birjolǵy qarjylaı kómek beriledi, dep habarlaıdy QazAqparat QR Eńbek jáne halyqty áleýmettik qorǵaý mınıstrligine silteme jasap.

Qarjylaı kómek kelesi azamattar sanatyna arnalǵan:

Jeńiske úles qosqan UOS qatysýshylary men múgedekterine teńestirilgen tulǵa - 376 adam; UOS jyldarynda tylda eńbek etkender - 109 040 adam;

qorshaýdaǵy Lenıngrad qalasynda turǵandar - 87 adam; kámelet jasqa tolmaǵan kezinde kontslager, getto jáne basqa da májbúrli túrde qamap ustaý jerlerinde tutqynda bolǵandar - 289 adam; UOS kezinde qaza tapqan (habar-osharsyz ketken) áskerı qyzmetkerlerdiń, partızandar men astyrtyn áreket etýshilerdiń qaıta turmysqa shyqpaǵan jubaılary - 15 adam;

qaıtys bolǵan soǵys múgedekteriniń áıelderi - 4 866 adam.

QR Eńbek jáne halyqty áleýmettik qorǵaý mınıstrligi oblystar men respýblıkalyq mańyzy bar qalalardyń ákimdikterine Ekinshi dúnıejúzilik soǵysta jeńiske jetýge úles qosqan barlyq sanattaǵy azamattarǵa qarjylaı kómektiń kepildendirilgen shekti mólsherin ornatýdy usyndy.

Nátıjesinde, UOS qatysýshylary men múgedekterine birjolǵy materıaldyq kómek keminde 500 myń teńge kóleminde belgilendi. Qorshaýda bolǵan Lenıngrad qalasynda turǵandar men kontslagerlerdiń burynǵy kámeletke tolmaǵan tutqyndary - keminde 50 myń teńge. Ekinshi dúnıejúzilik soǵystyń qaıtys bolǵan múgedekteriniń áıelderine, Ekinshi dúnıejúzilik soǵysta qaıtys bolǵan jaýyngerlerdiń jesirlerine jáne Ekinshi dúnıejúzilik soǵys jyldaryndaǵy tyl eńbekkerlerine - keminde 30 myń teńge.

Tólemder birqatar aımaqtarda, mysaly, Shyǵys Qazaqstan, Qostanaı, Pavlodar oblystarynda jáne taǵy basqa óńirlerde júrgizildi.

Sondaı-aq, Jeńistiń 75 jyldyǵyn merekeleý qurmetine, ardagerlerge dástúrli azyq-túlik qorjyny usynylady.

Sonymen qatar, barlyq ardagerlerdiń áskerı qyzmetshilerge qoldanylatyn quqyqtary men kepildikteri bar. Mysaly, olar jeńildikpen baspana alady, salyq jeńildigi bar, tegin medıtsınalyq kómek pen shıpajaıda emdeledi.

Memleket tarapynan jyl saıyn respýblıkalyq bıýdjetten tólenetin zeınetaqy men járdemaqy mólsherin ulǵaıtý boıynsha sharalar qabyldanýda. Búgingi kúni áleýmettik tólemderdiń ortasha jıyntyq mólsheri:

- Ekinshi dúnıejúzilik soǵysqa qatysýshylarǵa - 164 542 teńge;

- Ekinshi dúnıejúzilik soǵys múgedekterine - 169 762 teńge;

- Ekinshi dúnıejúzilik soǵysqa qatysýshylarǵa teńestirilgen adamdarǵa - 156 000 teńge;

- Ekinshi dúnıejúzilik soǵys múgedekterine teńestirilgen adamdarǵa - 109 427 teńge;

- Ekinshi dúnıejúzilik soǵys jyldaryndaǵy tyl eńbekkerlerine - 107 577 teńge.

Esterińizge sala keteıik, búgin Parlament Senaty «Ardagerler týraly» zańyn qabyldady. Bul óz kezeginde 10 myńnan astam adamǵa alǵash ret basqa elder aýmaǵyndaǵy áskerı is-qımyl ardageri resmı mártebesin alýǵa múmkindik beredi.

Bul shara eń aldymen tájik-aýǵan telimindegi TMD syrtqy shekarasyn qorǵaýdy kúsheıtýge, Taýly Qarabaqtaǵy ultaralyq qaqtyǵysqa, Iraktaǵy bitimgershilik operatsııasyna jáne taǵy basqa áskerı is-qımyldarǵa qatysqan áskerı qyzmetkerlerge qatysty bolady.

Sonymen qatar, atalǵan zań ardagerlerge elimizdiń zańnamasynda belgilengen barlyq jeńildikter men kepildikterdiń sapasyn saraptaýdy kúsheıtedi.

Nátıjesinde, bıyl Qazaqstanda ardagerlerdi memlekettik qoldaý 169 myńnan 181 myń adamǵa deıin artady.