Qazaqstanda maýsymdyq tumaýǵa qarsy vaktsına jasaldy
ASTANA. QazAqparat - Bıyl elimizdiń turǵyndary maýsymdyq tumaýǵa qarsy otandyq vaktsınany paıdalana bastaıdy. Qazaqstanda shyǵarylǵan alǵashqy vaktsınany Bıologııalyq qaýipsizdik máseleleri jónindegi ǴZI bas dırektorynyń orynbasary Berik Haırýllın oılap tapty, dep habarlaıdy QazAqparat QR BǴM Ǵylym komıtetiniń baspasóz qyzmetine silteme jasap.
Úsh valentti splıt-vaktsınany klınıkalyyq zertteýdiń birinshi fazasy aıaqtaldy. Búginde Qazaqstan jyl saıyn preparatty shetelden satyp alýǵa májbúr, biraq jańadan jasalǵan otandyq analog sheteldik preparattardan esh kem emes. Júrgizilgen zertteýlerdiń qorytyndysy boıynsha synalǵan vaktsına zııansyz jáne ımmýnogendi bolyp tabylady jáne QR memlekettik farmakopııa talaptary men eýropalyq krıterıılerge sáıkes keledi.
«Joba 2016 jyly aıaqtaldy, biraq vaktsınalardy jasaý úshin jeke zaýyt qajet. Otandyq preparat baǵasy men sapasy jaǵynan sheteldik analogtardan kem bolmaıdy. Qazirgi kezde Qazaqstanda maýsymdyq tumaýǵa qarsy vaktsınalar satylmaıdy. GMP halyqaralyq standartyna saı keletin zaýyttyń qurylysyna jumsalatyn shyǵyn 3-4 jylda aqtalady dep kútilýde», - deıdi Berik Haırýllın.
Joba aıasynda vaktsınany klınıkalyq zertteýdiń birinshi fazasyna eriktilerdi jınaý krıterııleri boıynsha volonterlar skrınıngten ótkizildi, sonymen qatar, klınıkalyq zertteýlerdiń ekinshi fazasyna vaktsınanyń tájirıbelik-ónerkásiptik serııasy ázirlendi.
Aıta keteıik, 2011 jyly ǴZI Shveıtsarııada maýsymdyq tumaýǵa qarsy vaktsınany jasaý boıynsha Dúnıejúzilik densaýlyq saqtaý uıymynyń tenderin jeńip alǵan bolatyn.
