Qazaqstanda máslıhattarda shyǵyp qalǵandardyń ornyna jańa depýtattar saılandy
ASTANA. 2 sáýir. QazAqparat - Respýblıkanyń 13 óńirinde máslıhattardyń shyǵyp qalǵan depýtattarynyń ornyna 57 saılaý okrýginde saılaý ótkizildi.
Bul týraly QR Ortalyq saılaý komıssııasynyń bas mamany Venera Jeksembekova habarlady.
Onyń aıtýynsha, 6 oblystyq máslıhattyń, 13 qalalyq máslıhattyń jáne 38 aýdandyq máslıhattyń depýtattary saılandy.
Usynylǵan 167 kandıdattyń ishinen 59-yn saıası partııalar usyndy, qalǵandary ózin-ózi usyndy.
«Saılaý bıýlletenderine 140 kandıdattyń tegi engizildi. Ortasha básekelestik bir depýtattyq mandatqa shamamen 3 kandıdatty qurady.
Daýys berý 275 saılaý ýchaskesinde ótti», - dep atap ótti V. Jeksembekova brıfıngte.
Daýys berýge 163433 saılaýshy qatysyp, jalpy saılaýshylardyń 74 %-yn qurady.
«Jalpy saılaý naýqany saılaý zańnamasy normalarynyń talaptaryna sáıkes ótti. Ortalyq saılaý komıssııasyna shaǵymdar men ótinishter kelip túsken joq», - dep túıindedi V. Jeksembekova.
