Qazaqstanda máslıhat saılaýy qashan ótedi
ASTANA. KAZINFORM — Ortalyq saılaý komıssııasy Qazaqstan Respýblıkasy máslıhattary depýtattarynyń kezekten tys saılaýyn taǵaıyndaý máselesin qarady.
— Jaqynda ǵana Qazaqstan Respýblıkasynyń quryltaıynyń depýtattaryn saılaý ótkizildi. Endi máslıhattar depýtattarynyń kezekten tys saılaýyn uıymdastyrý jáne ótkizý boıynsha jańa saılaý naýqanyna kirisemiz. Qazaqstan Respýblıkasy Prezıdentiniń barlyq deńgeıdegi máslıhattardyń ókilettigin merziminen buryn toqtatý týraly jarlyǵyna sáıkes saılaý naýqanyn uıymdastyrýǵa jáne ótkizýge baǵyttalǵan tıisti jumystar bastalady, — dedi Ortalyq saılaý komıssııasy tóraǵasy Nurlan Ábidrov.
Saılaý týraly konstıtýtsııalyq zańnyń 101-babynyń úshinshi tarmaǵyna sáıkes, Ortalyq saılaý komıssııasy ókilettikteri merziminen buryn toqtatylǵan máslıhattar depýtattarynyń kezekten tys saılaýyn ókilettikterdiń merzimi toqtatylǵan kúnnen bastap eki aıdan keshiktirmeı ótkizýi qajet.
— QR saılaý týraly zańnyń 12-babynyń 14-tarmaqshasyna, 101-babynyń 3-tarmaǵyna, 103-babynyń 7-tarmaǵyna, 104-babynyń 8-tarmaǵyna sáıkes jáne Prezıdenttiń barlyq deńgeıdegi máslıhattardyń ókilettigin merziminen buryn toqtatý týraly Jarlyǵynyń negizinde Ortalyq saılaý komıssııasy Qazaqstan Respýblıkasynda máslıhattar depýtattarynyń kezekten tys saılaýyn 2026 jylǵy 29 qarashaǵa taǵaıyndaý týraly qaýly jobasyn usynady, — dedi OSK tóraǵasynyń orynbasary Muhtar Erman.
Saılaý komıssııasy tıisti Qaýlyny qabyldady. Máslıhattar tıisti ákimshilik-aýmaqtyq bólinisiniń halqy jalpyǵa birdeı, teń, tikeleı saılaý quqyǵy negizinde jasyryn daýys berý arqyly 5 jyl merzimge saılanady.
Aldaǵy saılaý sheńberinde 228 máslıhatta 3447 depýtatty saılaý josparlanýda. Atap aıtqanda: 668 mandat oblystyq, 626 mandat qalalyq, 2053 mandat aýdandyq mandat bar.
Eske sala ketsek, keshe Memleket basshysy barlyq deńgeıdegi máslıhattardyń ókilettigin merziminen buryn toqtatý týraly Jarlyqqa qol qoıdy.
Sondaı-aq Quryltaı janynan máslıhattarmen ózara is-qımyl jónindegi keńes qurylady.
