Qazaqstanda mashına jasaýshy kompanııalarǵa salyq jeńildikteri engizilmek
NUR-SULTAN. QazAqparat – Májilis depýtaty, Qazaqstan mashına jasaýshylar odaǵynyń tóraǵasy Meıram Pishembaev mashına jasaý salasyn damtý josparymen bólisti, dep habarlaıdy QazAqparat tilishisi.
«Mashına jasaý salasynyń damýy – ol kez kelgen el ekonomıkasynyń kórsetkishi. Germanııa ekonomıkasynda bul salaǵa 40 paıyzǵa deıin, Reseıde 27 paıyzǵa deıin tıesili. Ókinishke qaraı, bizde mashına jasaý bul deńgeıge jete qoıǵan joq. Alaıda sońǵy jyldary osy baǵytta qarqyndy damý bar, sáıkesinshe, ımport qysqaryp, kásiporyndar sany artyp keledi. Eń bastysy – eli ishinde jáne shetelde ónimge suranys bar. Kórshi elder ózderiniń mashına jasaý salasyn belsendi túrde damytýyna baılanysty bizge olardan qalys qalýǵa bolmaıdy», - dedi M. Pishembaev Úkimet úıinde ótken baspasóz máslıhatynda.
Onyń sózine qaraǵanda, Qazaqstanda salany damytý úshin qajetti áleýet pen baza bar.
Mashına jasaý ónimi kólemin arttyrý, ishki tutyný kólemin joǵarylatý, ımportqa táýeldilikti tómendetý, sondaı-aq eksportqa negizdelgen ónimdi kóbeıtý úshin 2019-2024 jyldarǵa arnalǵan Mashına jasaýdy damytýdyń jol kartasy ázirlendi.
«Atalǵan qujat úsh basymdyqqa negizdelgen. Birinshisi - ónerkásiptik saıasat týraly zańdy qabyldaý, ekinshisi – QR Indýstrııa jáne ınfraqurylymdyq damý mınıstrligi janynda Qazaqstannyń ónerkásiptik damýy qoryn qurý. Úshinshisi – kásiporyndar úshin salyqtyq jeńildikterdi engizý usynylýda. Bul turǵyda qoldanystaǵy óndiris qýattaryn jańǵyrtý men otandyq kásiporyndardyń eksporttyq áleýetin arttyrýǵa ekpin qoıylady», - dedi Qazaqstan mashına jasaýshylar odaǵynyń tóraǵasy.
