Qazaqstanda mashına jasaýdy damytý jónindegi jańa keshendi jospar ázirlenip jatyr

ASTANA. QazAqparat - QR Premer-Mınıstri Álıhan Smaıylov Qazaqstan mashına jasaýshylar odaǵynyń basqarma tóraǵasy Meıram Pishembaevpen kezdesti, dep habarlaıdy QazAqparat Úkimettiń resmı saıtyna silteme jasap.

Birlestik basshysy Memleket basshysynyń tapsyrmasymen ázirlenip jatqan salany damytýdyń aldaǵy 5 jylǵa arnalǵan keshendi josparynyń negizgi baǵyttaryna toqtaldy. Onyń ishinde mashına jasaý salasynyń óndiris kólemin arttyrý, ınvestıtsııa tartý, óndiristik jáne eksporttyq múmkindikterdi damytý, otandyq ónim úshin ótkizý naryǵyn keńeıtý jáne sala úshin bilikti kadrlar daıarlaý júıesin jetildirý sharalary bar. Keshendi jospardy júzege asyrý otandyq mashına jasaý salasyn damýdyń túbegeıli jańa deńgeıine shyǵarady degen boljam bar.

Kezdesý barysynda salalyq kásiporyndardy otandyq shıkizatpen qamtamasyz etý, mashına jasaýdaǵy shaǵyn jáne orta kásipkerlikti qoldaý jáne salyqtyq yntalandyrý máseleleri talqylandy.

Sonymen qatar Meıram Pishembaev Premer-Mınıstrdi osy jyldyń 11-12 mamyrynda ótetin Qazaqstan mashına jasaýshylarynyń XI forýmyna daıyndyq barysy týraly habardar etti.

Kezdesý qorytyndysy boıynsha Álıhan Smaıylov Keshendi jospardy ázirleý boıynsha birqatar usynys berip, salany damytýda bıznes-qoǵamdastyǵynyń naqty usynystaryna basa nazar aýdarý kerektigin atap ótti.