Qazaqstanda mánerlep syrǵanaý sporty qalaı damyp jatyr
«Qazaqstan quramasy mánerlep syrǵanaýdan abyroıly bolǵan edi. Elimizdi kúlli álemge tanytqan Denıs Ten aramyzda joq, Elızabet Tursynbaeva da kásibı mansabyn aıaqtady. Jalpy mánerlep syrǵanaý sportyn nasıhattaý jáne damytý isinen memleket shet qalǵan syńaıly. Buǵan ne sebep? Mánerlep syrǵanaý sportyn damytýǵa ne kedergi?», - dep suraq qoıdy jýrnalıst Ortalyq kommýnıkatsııalar qyzmetinde ótken baspasóz máslıhatynda.
«Mánerlep syrǵanaýdan Denıs Ten Sochıdegi Olımpıadadan júlde ákelgennen keıin, bizde bul sport qarqyndy damý ústinde. Qazir de toqtap qaldy dep aıtýǵa bolmaıdy. Nege deseńiz, Denıstiń jolyn Elızabet Tursynbaeva, Aıza Mambekova sekildi sportshylarymyz jalǵastyryp keledi. Qazir Elızabet te óz mansabyn toqtatty, biraq artynda izbasarlary bar. Olardy daıyndaýǵa múmkindik bar esepteýge bolady. Qysqy Spartakıada oıyndarynda kóptegen óńirlerden sportshylarymyz qatysyp, nátıje kórsetken edi. Tek Almaty men Nur-Sultannan emes, Qyzylorda men Mańǵystaýdan da jas sportshylar kóringen edi. Endi Olımpıada óte úlken deńgeı bolǵandyqtan, sportshylarymyz biraz ýaqyttan keıin daıyn bolady degen senimdemin. Úkimet óz tarapynan sol sport túrine bar kúshin salyp jatyr, jańa nysandar iske qosyldy, qysqy muz aıdyndary ashylyp jatyr. Ońtústik aımaqtarda da bul jumys jalǵasýda», - dedi S. Jarasbaev.
Aıta keteıik, XXIV qysqy Olımpıada oıyndary Qytaıdyń Beıjiń qalasynda, 2022 jyldyń 4 men 20 aqpan aralyǵynda ótedi. Onda jalpy sany 109 medal sarapqa salynady. Jarystar Beıjiń qalasynan bólek qasyndaǵy ıAntsın jáne Chjıantszıakoý qalalarynda da ótedi.
