Qazaqstanda mámlúk kezeńindegi ıslam mádenıetiniń kórmesi ótedi

KAIR. QazAqparat- Bıyl Qazaqstanda Beıbarys sultannyń 800 jyldyǵy keń kólemde atap ótilýde. Qazirgi ýaqytta qazaqstandyq delegatsııa «áz-Zahır Beıbarys» meshitiniń ashylýyna jáne Beıbarys sultanǵa arnalǵan halyqaralyq ǵylymı-praktıkalyq konferentsııaǵa qatysý úshin Mysyr eline kelgen bolatyn, dep habarlaıdy QazAqparat.

Aıta keterligi, búgin, 4 maýsymda qazaqstandyq óner sheberleriniń, ártisterdiń qatysýymen gala-kontsert jáne Egıpettegi Qazaqstannyń mádenıet kúnderine arnalǵan qoldanbaly óner kórmesi ótedi.

Sondaı-aq Kaır qalasy «CAIRO OPERA HOUSE» opera teatrynda Qazaqstan óner juldyzdarynyń qatysýymen Gala-kontsert uıymdastyrylady. Saltanatty kontsertte óner juldyzdary tanymal estradalyq ánder men halyq kompozıtorlarynyń shyǵarmalaryn oryndaıdy.

Budan basqa, Qurmanǵazy atyndaǵy qazaq ulttyq halyq aspaptar orkestri, Qazaqstan Respýblıkasynyń «Saltanat» Memlekettik bı ansambli, «Satzhan Project», «Sulý» jáne «Alashuly» toptary qatysady.

Sonymen qatar, 4 maýsym kúni «CAIRO OPERA HOUSE» opera teatrynda qazaq halqynyń dástúri men ónerinen syr shertetin Qazaqstannyń «Sándik-qoldanbaly óner» sheberleriniń kórmesi kórermen nazaryna usynylady.

Kórmeniń maqsaty - Qazaqstannyń sándik-qoldanbaly ónerin dáripteý, ulttyq murany nasıhattaý.

Taraptardyń osyǵan deıingi kezdesýinde Qazaqstan men Mysyr eliniń resmı organdary arasynda bıylǵy qarashada Úkimetaralyq komıssııanyń VI otyrysyn ótkizý jaıy talqylandy.

Qazaqstandaǵy Egıpettiń elshisi Manal Elshınnavı hanym buǵan deıingi kezdesýlerde QR Ulttyq mýzeıinde mámlúk kezeńindegi ıslam mádenıetiniń kórmesin ótkizý nıeti týraly málimdegen. Mysyr tarapy is-sharany bıyl uıymdastyrýdy josparlap otyr. Mádenıet jáne sport mınıstri Ashat Oralov bul bastamany iske asyrýǵa járdemdesýge daıyn ekenin bildirdi.

Mınıstr sondaı aq, bıyl Baıbarys sultannyń 800 jyldyq mereıtoıy aıasynda birqatar is-sharalar halyqaralyq deńgeıde ótip jatqanyn aıtty. Onyń sózinshe, jalpy mereıtoı aıasynda 600-ge jýyq is-shara josparlanǵan.

«Qazaqstannyń Mysyrdaǵy mádenıet kúnderi-elimizdiń mádenıet jáne óner salasynyń qyzmetkerleri úshin óz talanttaryn kórsetýge berilgen úlken múmkindik. Sondaı-aq, elderimiz arasyndaǵy tikeleı reıster sanyn arttyrý boıynsha is-sharalardy pysyqtaýdy usynamyn. Qazaqstanda Mysyrdan kelgen qonaqtarǵa, onyń ishinde elimizdiń týrıstik sektoryndaǵy ınvestıtsııalyq jobalar boıynsha usynatyn dúnıeler barshylyq», - dedi Mádenıet jáne sport mınıstri.