Qazaqstanda mamannan talap etiletin «daǵdylar tizbesi» jasalyp jatyr
Eńbek jáne halyqty áleýmettik qorǵaý birinshi vıtse-mınıstri Aqmádı Sarbasovtyń aıtýynsha, Qazaqstanda mamandardyń biliktiligin anyqtaý retteletin jáne rettelmeıtin qyzmet túrleri boıynsha ártúrli tásildermen júzege asyrylady.
«Memlekettik organdar biliktilikti rastaıtyn qujat bolǵan kezde ǵana júzege asyrylýy múmkin kásipti nemese qyzmetti aıqyndaıdy. Al «Atameken» ulttyq kásipkerler palatasy rettelmeıtin kásipter boıynsha sertıfıkattaý ortalyqtaryn akkredıtteý arqyly mamandardyń biliktiligin tekseredi. Jalpy elimiz boıynsha osyndaı 38 ortalyq bar. Onyń 28-i jumys berýshiler birlestikteri janynan, 9-y kásiporyndar bazasynda, bireýi kolledj bazasynda qurylǵan», - deıdi mınıstrdiń birinshi orynbasary.
Sondaı-aq, ol rettelmeıtin mamandyqtar boıynsha sertıfıkattaý júrgizý tártibi áli reglamenttelmeı jatqanyn atady.
«Daǵdylardy taný jáne biliktilikke sáıkestikti baǵalaý úshin biliktilikter jónindegi ulttyq organ qurýǵa múmkindik beretin normatıvtik negiz qalaý qajet. Elektrondyq eńbek bırjasynda eńbek naryǵynda talap etiletin arnaıy (kásibı) jáne jalpy (ıkemdi) daǵdylardyń tizbesi – daǵdylar banki quryldy. Oǵan qazirdiń ózinde 8 myń daǵdy engizild. Olardyń ishindegi eń tanymaldary boıynsha qysqa merzimdi oqytý kýrstary men onlaın-kýrstar ázirlenýde. Aldaǵy ýaqytta daǵdylar banki kásibı daǵdylar men biliktilikterdiń salystyrmalylyǵyn arttyrýǵa múmkindik beredi. Naryqqa qajetti kásibı daǵdylar men mansapty jaqsyraq tańdaý úshin jumys túrleri týraly halyqtyń habardarlyǵyn jaqsartady», – dep túıindedi vıtse-mınıstr.
