Qazaqstanda mamandandyrylǵan mektepter sany 134-ke jetti
Bul týraly QazAqparat QR Oqý-aǵartý mınıstrliginiń baspasóz qyzmetine silteme jasap habarlaıdy.
Mamandandyrylǵan mektepter elimizdiń barlyq aımaǵynda ashylǵan. Emtıhandardan súrinbeı ótken balalar bul bilim ordalarynda tegin bilim ala alady. Sonymen qatar bıyl Balalar jylynda alǵash ret áleýmettik osal toptan shyqqan balalarǵa erekshe múmkindikter jasaldy.
«Mınıstrlik daryndy balalardy qoldaý boıynsha jan-jaqty jumys júrgizip jatyr. Qazirgi kúni 134 mamandandyrylǵan mektep jumys isteıdi. Daryndy balalar respýblıkalyq jáne halyqaralyq olımpıadalarǵa belsene qatysyp, jeńis tuǵyrynan kórinip júr. Mysaly, byltyr 420-dan astam oqýshy respýblıkalyq olımpıadalardyń júldegerleri men jeńimpazdary atandy. Olardyń ustazdary da jaqsy úlgi kórsetip, «Úzdik pedagog», «Úzdik avtorlyq baǵdarlama», «Pedagogıkalyq ıdeıalar festıvali», «Daryndy balalardyń talantty muǵalimi» syndy baıqaýlarǵa qatysyp júr», - dedi «Daryn» respýblıkalyq ǵylymı-praktıkalyq ortalyǵynyń dırektory Ánýar Ýnaıbekov.
134 mekteptiń 94-i jaratylystaný-matematıka baǵytynda, 6 mektep qoǵamdyq-gýmanıtarlyq baǵytta, 8-i kópsalaly, 5-eýi áskerı sport, 6-ýy mýzykalyq-estetıkalyq baǵytta jumys isteıdi. Taǵy 15 mektepke Abaı Qunanbaev esimi berilgen. 95 mektepte ınternat úıleri bar.
Mamandandyrylǵan mektepterdegi oqý úrdisi ulttyq bilim berý júıesin halyqaralyq standarttarmen biriktirý arqyly jasalǵan. Árbir oqýshy jeke oqý jospary boıynsha oqıdy. Mundaı tásil balalardyń áleýetin barynsha ashýǵa jáne olardyń ıntellektýaldyq, shyǵarmashylyq qabiletterin damytýǵa múmkindik beredi.
Akademııalyq adaldyq pen ashyqtyqty saqtaý maqsatynda Oqý-aǵartý mınıstriniń buıryǵymen mamandandyrylǵan mektepterge oqýshylardy irikteý konkýrstyq negizde júrgiziledi. Komıssııa irikteý kezinde matematıkalyq saýattylyq pen oqý saýattylyǵyn, sondaı-aq Qazaqstan tarıhyn bilý deńgeıin baǵalaıdy.
