Qazaqstanda malǵa qajetti bıopreparattardyń sapasyn baqylaıtyn mekeme qurý usynyldy
«Jalpy Qazaqstanda óndiriletin jáne shetelden ákelinetin veterınarlyq preparattardyń sapasyn baqylaý kerek. Osy maqsatta respýblıkada memlekettik ǵylymı baqylaý mekemesin qurý kerek dep esepteımiz. Malǵa qoldanylatyn sapasyz bıopreparattardyń mysalyn bizdiń ınstıtýttyń 2016-2017 jyldary júrgizgen zertteý qorytyndylarynan kórýge bolady. Máselen, oqyra, qarasanǵa qarsy Norvegııa, Reseı, Úndistan, Ońtústik Koreıa, Chehııa, Qazaqstanda jasalǵan vaktsınanyń normatıvti-tehnıkalyq qujattaryna sıpattama jasap kórgen edik. Zertteý barysynda oqyraǵa qarsy vaktsınalardyń 10 serııasynyń úsheýi ǵana standartqa sáıkes bolyp shyqty», - dedi Ahmetjan Sultanov Parlament Májilisinde agrarlyq ǵylymdy, bilim jáne óndiristi ıntegratsııalaý máseleleri boıynsha otyrysta.
Instıtýt dırektorynyń aıtýynsha, malǵa qajetti dıagnostıkalyq jáne emdeý, aldyn alý sharalaryna arnalǵan otandyq preparattarynyń sapasy tómendep ketken. Artynsha ımporttyq bıologııalyq preparattarǵa degen suranys artqan.
«Malǵa dıagnostıkalyq zertteý jumystaryn júrgizý úshin respýblıkaǵa 500 mln teńgeniń bıopreparattary shet elderden kirgiziledi. Al otandyq óndirýshiler bul bıopreparattardyń 300 mln teńgege jýyq qajettigin ótep otyr. Vaktsınalarda da jaǵdaı osy. Bul baǵytta shetelden 2,5 mlrd teńgeniń vaktsınalyq preparattary jetkizilse, óz elimizde otandyq óndirýshiler 500 mln teńgeniń ǵana vaktsınasyn usyna alady. ıAǵnı osy qajettiliktiń 16 paıyzyn otandyq óndirýshiler jasap shyǵarsa, 84 paıyzyn sheteldik tasymaldaýshylar ákeledi», - dedi ol.
Ahmetjan Sultanov eldegi otandyq bıopreparattarmen ishki qajettilikti jabýǵa múmkindik baryn aıtady.
«Oqý ortalyqtaryndaǵy tar sheńberdegi mamandyqtar men zamanǵa saı qurylǵylardyń kómegimen ishki qajettilikti qanaǵattandyrýǵa bolady. Qazaqstanda bıotehnologııalyq profılder boıynsha mamandar barshylyq. Olar otandyq bıologııalyq salany jandandyryp, qajetti bıopreparattardyń óndirisin retke keltire alady», - dedi ol.
