Qazaqstanda maldy basqa elge satýǵa tyıym salynýy múmkin

NUR-SULTAN. QazAqparat – QR Aýyl sharýashylyǵy mınıstrligi maldyń shetelge baqylaýsyz satylýyna shekteý qoımaq, dep habarlaıdy QazAqparat tilshisi.

«Qazaqstan etten góri shetke maldy eksporttaı bastady. Bul múıizdi iri qaraǵa da, qoıǵa da qatysty áńgime. Tek bıyldyń ózinde iri qara eksporty eki esege ósti. Bul baǵytta eksport saıasatyn ózgertý kerek», - dedi senator Álı Bektaev Parlament Senatynyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysynda.

Atalmysh otyrysta «Agroónerkásip keshenin retteý máseleleri boıyna QR-nyń keıbir zańnamalyq aktilerine ózgerister men tolyqtyrýlar engizý týraly» zań jobasy talqylanǵan bolatyn. Senatordyń bul paıymyna jaýap bergen Aýyl sharýashylyǵy mınıstri Saparhan Omarov naqty qandaı baǵytqa basymdyq berilgenin atap ótti.

«Búgin biz asyl tuqymdy maldy eksporttaýǵa tyıym saldyq. Respýblıkada qazirgi tańda negizinen Ózbekstanǵa maldy eksporttaıtyn 78 mal bordaqylaý alańy bar. Olardyń aldaǵy ýaqytta 50-ge jýyǵyna mal eksporttaýǵa tyıym salýdy kózdeýdemiz. Óıtkeni biz aǵymdaǵy ahýaldy qadaǵalaı almaı otyrmyz. Keıin jaǵdaıdy baqylaýda ustaýǵa bolady. Qazir et óńdeıtin zaýyttarmen kelissózder júrgizilýde. Zaýyttarǵa maldy jetkizý maqsatynda sýbsıdııa engizbekpiz. Atalǵan máselelerdi sheshýge baǵyttalatyn ádister osy. Búgingi tańda elimizde 175 qaıta óńdeý kásiporny jumys isteıdi, olardyń qýaty 38-40 paıyzdeńgeıinde ǵana», - dep túsindirdi mınıstr.

Mınıstrdiń bul sózin tyńdaı kele depýtattar shetelge maldy eksporttaýǵa tolyq tyıym salýdy usyndy. Alaıda Aýyl sharýashylyǵy mınıstri bul másele sońǵy aılarda qyzý talqylanǵanyn, tipti mal ósirýshilerdiń oıyn ekige bólgenin aıtady.

«Biraq bul másele qarastyrylyp jatyr», - dep qorytyndylady Saparhan Omarov.