Qazaqstanda maldardy májbúrli joıý sharalary júrgizilmeıdi
ASTANA. KAZINFORM — Aýyl sharýashylyǵy mınıstrligi áleýmettik jelilerde iri qara maldy tárkileý men joıý týraly taralǵan beınematerıaldardyń Qazaqstanǵa qatysy joq ekenin habarlady.
AShM Veterınarııalyq baqylaý jáne qadaǵalaý komıtetiniń tóraǵasy Qazbek Tashımov jelide taralǵan aqparatty joqqa shyǵaryp, túsinikteme berip ótti.
— El aýmaǵynda aýyl sharýashylyǵy janýarlaryn tárkileý nemese májbúrli túrde joıýǵa qatysty kez kelgen is-sharalar qoldanystaǵy zańnamany qatań saqtaı otyryp — tıisti aýmaqtyń bas memlekettik veterınarııalyq-sanıtarııalyq ınspektorynyń sheshimi negizinde jáne jergilikti atqarýshy organdardyń mindetti túrde shekteý sharalaryn engizýimen júrgiziledi. Mundaı is-sharalar týyndaǵan jaǵdaıda tek respýblıkalyq epızootııaǵa qarsy otrıad tarapynan júzege asyrylady. Qazirgi ýaqytta Qazaqstanda shekteý sharalaryn engizý týraly sheshimder, sondaı-aq aýyl sharýashylyǵy janýarlaryn tárkileý jáne joıý jóninde nusqamalar qabyldanǵan joq. Tek resmı málimetterge senýge jáne halyq arasynda negizsiz alańdaýshylyq týdyratyn tekserilmegen aqparatty taratpaýǵa shaqyramyz, — delingen habarlamada.
Budan buryn SQO-da bıyl jańadan 57 veterınarııalyq pýnkt jáne eki stantsııa ashylatyny málim boldy.