Qazaqstanda mal jáne ósimdik sharýashylyǵynyń genetıka ortalyǵy qurylady

ASTANA. KAZINFORM — Memleket pen bıznes Qazaqstanda qundy asyl tuqymdy mal men mal azyqtyq daqyldardy ósirý úshin kúsh biriktirmek. Úkimette ótken kezdesý barysynda Premer-Mınıstrdiń orynbasary Serik Jumanǵarın Qazaq mal sharýashylyǵy jáne jemshóp óndirisi ǵylymı-zertteý ınstıtýtynyń ǵylymı qoldaýymen «Zhersu» korporatsııasynyń selektsııalyq mal sharýashylyǵyn damytý boıynsha usynystaryn tyńdady.

Vıtse-premer maýsym aıynyń birinshi jartysynda Jetisý óńirine saparynyń qorytyndysy boıynsha aýyl sharýashylyǵy janýarlarynyń genetıkalyq selektsııasy boıynsha jeke kásipkerliktiń jınaqtalǵan tájirıbesin el aýmaǵynda taratýdyń yqtımal nusqalaryn ázirleýdi tapsyrǵan.

Kezdesýde «Zhersu» jáne QazUǴZI ókilderi mal sharýashylyǵy men jemshóp óndirýge arnalǵan genetıkalyq ortalyqtyń jobasyn tanystyrdy, onyń qyzmeti negizgi úsh baǵytty qamtıdy.

Ortalyqta ǵylymı súıemeldeý baǵytyndaǵy jumys sheńberinde asyl tuqymdy maldardyń selektsııasy men esebin qoldanystaǵy aýyl sharýashylyǵy janýarlaryn birdeılendirý bazasynda tsıfrlandyrý, jemshóp, sút, et sapasyn taldaý, DNQ-taldaý júrgizý jáne jemshóp daqyldary tuqymdarynyń sapasyn baǵalaý boıynsha akkredıttelgen bes zerthanasy bar genetıkalyq ortalyq qurý josparlanýda.

Sondaı-aq joba sheńberinde tabıǵı jaıylymdyq jerlerdiń ónimdiligin arttyrý tehnologııasyn ázirleý jáne engizý, keıinnen respýblıkanyń ońtústik-shyǵysynda qunarly jaıylymdar júıesin qalyptastyrý jáne jemshóp daqyldarynyń tuqym sharýashylyǵynyń zamanaýı bazasyn qurý josparlanýda.

Serik Jumanǵarın Qazaqstanda asyl tuqymdy mal men jemshóp daqyldarynyń selektsııasyn damytý boıynsha usynylǵan tásilderge qoldaý bildirdi.

Endi usynystar barlyq qajetti uıymdastyrýshylyq máseleler men iske asyrý merzimderi, sondaı-aq bıýdjettik ótinim boıynsha egjeı-tegjeıli qarastyrylady.