Qazaqstanda mal sharýashylyǵyn damytýǵa 100 mlrd teńge baǵyttalmaq

ALMATY. QazAqparat - Qazaqstannyń mal sharýashylyǵyn damytýǵa 100 mlrd teńge kóleminde qarjy bólinbek.

Bul týraly Almaty oblysyndaǵy shoshqa sharýashylyǵy kesheniniń ashylýynda QR Aýyl sharýashylyǵy vıtse-mınıstri Gúlmıra Isaeva aıtty.

«Agrobıznes-2020 baǵdarlamasy aıasynda mal sharýashylyǵyn damytýǵa 100 mlrd teńge kóleminde ınvestıtsııalyq demeýqarjy jumsalmaq. Olardyń ishinde shoshqa sharýashylyǵyn damytýǵa 14 mlrd teńge qarastyrylǵan», - dedi ol.

Gúlmıra Isaevanyń aıtýynsha, aýyl sharýashylyǵy mınıstrligi Qazaqstanda aldaǵy 7 jylda ónimdiligi jylyna 50 myń tonna bolatyn 26 iri shoshqa sharýashylyǵy kesheni men 4 suryptaý -gıbrıdtik ortalyq ashýdy josparlap otyr.