Qazaqstanda Mal ósirýshiler odaǵy óz jumysyn bastady
ASTANA. KAZINFORM — Mal sharýashylyǵy salasynyń qatysýshylarynyń múddelerin úılestirý jáne qorǵaý maqsatynda jańa salalyq birlestik quryldy, dep habarlaıdy AShM baspasóz qyzmeti.
Qazaqstan Mal ósirýshiler odaǵynyń dırektory Daýren Salyqovtyń aıtýynsha, Odaq qurý týraly sheshim kásibı qaýymdastyqtyń sala ishindegi ózara is-qımyldy júıeleý jáne mal sharýashylyǵyn damytýdyń negizgi máseleleri boıynsha birlesken ustanym qalyptastyrý qajettiligine jaýap retinde qabyldanǵan.
Birlestik quramyna respýblıkalyq salalyq palatalar, iri aýyl sharýashylyǵy taýar óndirýshileri, bordaqylaý alańdary, asyl tuqymdy sharýashylyqtar, et óńdeý kásiporyndary, sondaı-aq óndiristik tizbektiń ártúrli kezeńderinde — ósirýden bastap óńdeý men ótkizýge deıin qyzmet atqaratyn fermerlik qojalyqtar endi.
— Odaq qyzmetiniń basym baǵyttarynyń biri — shaǵyn jáne orta fermerlik sharýashylyqtardy qoldaý. Jańa alań fermerlerge memlekettik qoldaý sharalaryna, qarjylandyrýǵa, salalyq saraptamaǵa jáne ótkizý naryqtaryna qoljetimdilikti keńeıtýge, sondaı-aq naryqtyń iri qatysýshylarymen ózara is-qımyldy jáne kooperatsııany damytýdy jeńildetýge múmkindik beredi, — dep atap ótti Daýren Salyqov.
Jalpy alǵanda, Odaqtyń qyzmeti salanyń praktıkalyq mindetterin sheshýge baǵyttalǵan: mal sharýashylyǵy ónimderiniń ónimdiligi men sapasyn arttyrý, sharýashylyqtardyń ekonomıkalyq turaqtylyǵyn nyǵaıtý, qaıta óńdeý men eksporttyq baǵyttardy damytý.
Atalǵan birlestiktiń jumysy mal sharýashylyǵynyń úılesimdi damýyna yqpal etip, qazaqstandyq óndirýshilerdiń ishki jáne syrtqy naryqtardaǵy pozıtsııasyn nyǵaıtady dep kútilip otyr.
Budan buryn elde qoıshylar men baqtashylardyń zeınet jasyn tómendetetini málim boldy.