Qazaqstanda mal ósiretin fermerlik sharýashylyqtardyń sanyn bes esege arttyrý kózdelip otyr
ASTANA. QazAqparat - Qazaqstanda iri qara jáne usaq mal ósiretin fermerlik sharýashylyqtardyń sanyn 20 myńnan 100 myńǵa jetkizý kózdelip otyr. Bul týraly halyqqa esep berý kezdesýinde QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev málim etti, dep habarlaıdy QazAqparat tilshisi.
«Aýyl sharýashylyǵy baǵytynda Qazaqstannyń eksporttyq áleýeti bar pozıtsııalardy aıqyndap aldyq. Osyny baǵdamdap otyrsaq, Qazaqstannyń eksporttyq áleýetiniń eń joǵarysy - etti mal sharýashylyǵy. Qazirgi tańda aýyl sharýashylyǵynyń jáne óńdelgen azyq-túliktiń barlyq eksporty 1,4 mlrd teńgeni qurap otyr. Al etti mal sharýashylyǵy turǵysynan bizdegi áleýet 2,6 mlrd teńgeni jetedi», - deıdi mınıstr.
Ómirzaq Shókeeviń aıtýyna qaraǵanda, etti mal sharýashylyǵyn damytýdyń negizin shaǵyn otbasylyq, sharýashylyq - otbasylyq fermalar quraıdy.
«Baǵdarlama úlken kompanııalarǵa qatysty deseńiz, bul shyndyqqa sáıkes kelmeıdi. Bul - otbasylyq fermalar týraly baǵdarlama. Dál osy rette bizdiń baǵyt olarǵa kómek qolyn sozýdan turady. AQSh, Kanada, Avstralııa, Argentına, Ýrýgvaı sekildi damyǵan elderde óziniń tıimdiligin aıqyn dáleldegen modeldi ustanyp otyrmyz. Biraq, dese de qazir Qazaqstanda 150 asyl tuqymdy sharýashylyq bar. Bizdiń mindet - olardyń sanyn on jyldyń ishinde 310-ǵa deıin arttyrý bolyp tabylady. Bola ma, bolady. Іri qara maldy ustaıtyn 16 myń fermerlik sharýashylyq, usaq mal ustaıtyn 4 myń fermerlik sharýashylyq bar. Barlyǵy - 20 myń. Bizdiń tapsyrma - olardyń sanyn 10 jylda 100 myńǵa deıin jetkizý», - deıdi mınıstr.
Ómirzaq Shókeev búgingi kúni qolda barymyzdy damytýmen aınalysyp jatqanyn tilge tıek etti. Sonymen qatar, mınıstrdiń aıtýynsha, mal bordaqylaý alańyn sońǵy 10 jylda 30 myńnan 50 myńǵa deıin jetkizý josparlanyp otyr.
