Qazaqstanda mal basy sanaǵy nege júrgizilmeı qaldy
ASTANA. QazAqparat - Qazaqstanda sońǵy 12 jyldyń ishinde mal basynyń sanaǵy júrgizilmeı keledi. Onyń sebebin búgin Senat qabyrǵasynda ótken otyrysta QR Ulttyq ekonomıka mınıstrligi Statıstıka komıtetiniń tóraǵasy Nurbolat Aıdapkelov aıtyp berdi, dep habarlaıdy QazAqparat tilshisi.
«Qazaqstan Respýblıkasynyń Memlekettik statıstıka týraly zańnama qujattaryna ózgerister men tolyqtyrýlar engizý týraly» zań jobasy talqylanǵan otyrysta senatorlar komıtet tóraǵasyna Qazaqstandaǵy mal basyna nelikten sanaq júrgizilmeıtini týraly saýal qoıyldy.
«Óte durys aıtasyz. Bul sanaqty 2016 jyly bizdiń ótkizýimiz kerek edi. Biraq, buǵan Aýyl sharýashylyǵy mınıstrligi qarsy boldy. Degenmen, aýyl sharýashylyǵy sanaǵy on jyl saıyn júrgizý máselesi bul bizdiń zańda ǵana emes, aýyl sharýashylyǵy týraly zańda da kórsetilgen. Sonyń ózinde qyrýar qarjy ketedi dep, olar (AShM - avt.) aqshany odan da sýbsıdııaǵa beremiz dep, 2016 jyly sanaqty bloktap tastaǵan. Sonymen sanaq ótken joq. Qazir kúndelikti mal basynyń sany nemese egin máselesi de durys emes deıdi. Búkil álemdik órkenıetti memleketterdiń bári de qansha jerde óziniń tehnologııasyn damytsa da, on jylda bir ret naqtylaý jumysyn júrgizedi», - deıdi Nurbolat Aıdapkelov.
Komıtet tóraǵasynyń aıtýynsha, mysaly Reseıde on jylda bir ret aýyl sharýashylyǵy sanaǵy júrgizilse, bes jylda bir ret mal basynyń 30 paıyzyn qamtıtyn kishigirim sanaq júrgiziledi.
«Biz odan qalyp jatyrmyz. Bizde sońǵy aýyl sharýashylyǵy sanaǵy 2006 jyly júrgizilgen. Halyq sany jaǵynan biz endi durys baǵytta kele jatyrmyz. Tsıfrlandyrý jumysy boıynsha halyq sanaǵy kelesi jylda bizde eki jolmen júrgiziletin bolady. Birinshiden, ınternet arqyly, ekinshiden planshetke tirkeý arqyly ótkiziledi. Ol da progres dep esepteımiz», - deıdi ol.
Eske sala ketsek, búgin Parlament Senatynyń ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń Memlekettik statıstıka týraly zańnama qujattaryna ózgerister men tolyqtyrýlar engizý týraly» zań jobasy talqylandy. Zań jobasyn qorǵaǵan Nurbolat Aıdapkelovtiń aıtýynsha, jańa zań jobasy birqatar mindetterdi sheshýge baǵyttalǵan. Atap aıtqanda, zań jobasy boıynsha memlekettik statıstıka salasyndaǵy quqyqty retteýdi jetildirý, memlekettik statıstıka organdary qyzmetiniń ashyqtyq deńgeıin arttyrý, jınalatyn derekterdiń sapasyn arttyrý jáne resmı statıstıka aqparatynyń sapasyn qamtamasyz etý, respondenttermen jáne paıdalanýshylarmen keri baılanysty qamtamasyz etý, qaıtalanatyn kórsetkishterdi jınaý sekildi jumystardy retteý qarastyrylǵan.
