Qazaqstanda mal basy artyp, ónim óńdeý kólemi ulǵaıýda

NUR-SULTAN. QazAqparat - Bıyl 178 myń iri qara mal basyn jáne 250 myńnan astam usaq maldy satyp alýdy qarjylandyrý josparlanýda. Bul týraly QR Aýyl sharýashylyǵy mınıstri Saparhan Omarov esep berý kezdesýinde aıtty, dep habarlaıdy QazAqparat tilshisi.

«Mal sharýashylyǵy salasynda 4 paıyz kólemindegi turaqty ósim saqtalyp otyr. Jyl qorytyndysy boıynsha jalpy ónim kólemi 2,3 trln teńgege ósti. Kredıt berý jáne qosymsha sýbsıdııalaý arqyly iske asyrylǵan sharalar óz jemisin berdi. Máselen, iri qara mal men usaq mal 2,7, jylqy 11,5, shoshqa 2,5, qus 1,6 paıyzǵa artty. 2019 jyly qyzyl et óndirý kólemi 5,8, qus etin óndirý kólemi 15,8 paıyzǵa ulǵaıdy. Memlekettik qoldaýdyń arqasynda sút óńdeý 7, et óńdeý 8 paıyzǵa ósti. Bul rette sút zaýyttarynyń júktemesi 18, et kombınattarynyń júktemesi 21,6 paıyzǵa ulǵaıdy», - dedi mınıstr Ortalyq komýnıkatsııalar qyzmetindegi onlaın kezdesýde.

Onyń dereginshe, mal sharýashylyǵyn damytýǵa QazAgro 2019 jyly 156,5 mlrd teńge baǵyttady. Quny 53 mlrd teńge bolatyn 82 myń bas iri qara mal ákelý jáne 12,3 mlrd teńgege 374 myń bas usaq mal satyp alý júzege asyryldy. Sondaı-aq, quny 19,1 mlrd teńge bolatyn 16 jańa ınvestıtsııalyq joba qarjylandyryldy.

«Osylaısha, budan buryn qarjylandyrylǵan jobalardy eskergende, 2019 jyly mal sharýashylyǵynda jalpy quny 64,3 mlrd teńgege 54 ınvestıtsııalyq joba engizildi. Bıyl 178 myń iri qara mal basyn jáne 250 myńnan astam usaq maldy satyp alýdy qarjylandyrý josparlanýda. Sondaı-aq ımport almastyrý aıasynda 46 myń tonna sút jáne 30 myń tonna qus etin óndirý jobalaryn iske asyrý kózdelgen», - dedi Saparhan Omarov.