Qazaqstanda mal azyǵyn daıyndaý 89%-ǵa oryndaldy
ASTANA. KAZINFORM — Óńirlerde mal azyǵyn daıyndaý naýqany jalǵasyp jatyr. Oblys ákimdikteriniń jedel derekterine sáıkes, búgingi tańda aýyl sharýashylyǵy taýaryn óndirýshiler aldaǵy qysqy qorada ustaý kezeńine qajetti barlyq túrde 36,7 mln tonna jemshóp daıyndady. Bul josparlanǵan kólemniń 89%-yn quraıdy. Bul týraly AShM málim etti.
Qazirgi ýaqytta 25,9 mln tonna shóp daıyndaldy, bul jospardyń 101,2%-yn quraıdy. Sondaı-aq 2,3 mln tonna pishendeme (jospardyń 100,3%-y), 2,9 mln tonna qurama jem (jospardyń 50,1%-y), 1,8 mln tonna súrlem jáne 3,7 mln tonna saban daıyndaldy.
Qysqy qorada ustaý kezeńin ońtaıly ótkizý jáne saqtandyrý qorlaryn qalyptastyrý maqsatynda «Azyq-túlik kelisimshart korporatsııasy» aktsıonerlik qoǵamy 201,3 myń tonna astyq kóleminde jemdik qor qalyptastyrdy. Qajet bolǵan jaǵdaıda bul rezerv aýyl sharýashylyǵy taýaryn óndirýshilerdi jemshóp resýrstarymen qamtamasyz etý úshin paıdalanylatyn bolady.
— Naýqan elimizdiń barlyq óńirinde jalǵasyp jatyr. 2026–2027 jyldardaǵy qysqy qorada ustaý kezeńi bastalǵanǵa deıin 25,7 mln tonna shóp, 2,3 mln tonna pishendeme, 2,8 mln tonna súrlem, 4,8 mln tonna saban jáne 5,7 mln tonna qurama jem daıyndaý josparlanyp otyr, — delingen habarlamada.
Aýyl sharýashylyǵy mınıstrligi óńirlerdiń ákimdikterimen birlesip, jemshóp daıyndaý barysyn qatań baqylaýda ustap otyr. Júrgizilip jatqan monıtorıng pen rezervterdi ýaqtyly qalyptastyrý mal sharýashylyǵy sýbektilerin qajetti jemshóp qorymen qamtamasyz etýge jáne aldaǵy qysqy kezeńdi oıdaǵydaı ótkerýge baǵyttalǵan.
Aıta keteıik, elimizde dándi daqyldardyń 61,6%-y jınaldy, 13,5 mln tonna astyq bastyryldy.
