Qazaqstanda maqtany qaıta óńdeý úlesi 3 esege ulǵaıtylady
NUR-SULTAN. QazAqparat – Otandyq maqtany qaıta óńdeý úlesi 3 esege ulǵaıtylyp, 1 myń jumys orny ashylady, dep habarlaıdy QazAqparat QR IIDM baspasóz qyzmetine silteme jasap.
Mınıstrliktiń málimetinshe, bıylǵy aqpanda elimizdiń jeńil ónerkásibi salasynda óndiris kólemi 12,4% ósti. Onyń ishinde toqyma buıymdary 11,9%, kıim-keshek 9,7%, bylǵary jáne oǵan jatatyn ónimder óndirisinde 11,8% ósim baıqaldy.
«Qazaqstanda jeńil ónerkásip salasynda aýqymdy jumys júrgizilýde. Úkimet ótken jyldyń naýryz aıynda 2019-2021 jyldarǵa arnalǵan jeńil ónerkásipti damytý jónindegi jol kartasyn maquldady. Onda kásiporyndardy shıkizatpen qamtamasyz etý, taýarlardyń zańsyz aınalymyna qarsy kúres júrgizý, qazaqstandyq qamtý úlesin arttyrý, ekonomıkalyq yntalandyrý jáne júıeli qoldaý boıynsha sharalar kózdelgen», delingen habarlamada.
Elimizde kıim men aıaq kıim óndirýge arnalǵan matanyń kóptegen túri, daıyn teri, fýrnıtýra, sondaı-aq qoldanba materıaldar óndirisinde paıdalanylatyn hımııalyq reagentter men boıaǵyshtar óndirisi joq. Bul daıyn ónimniń ózindik qunyna áser etedi.
Qazaqstanda búgingi tańda qýattylyǵy 31 myń tonnaǵa deıin maqta talshyǵyn óńdeýge múmkindik beretin 4 toqyma maqta óńdeý kásiporny bar. Alaıda, olardyń ekeýi ǵana - «Azala Textile» JShS jáne «Azala Cotton» JShS turaqty jumys istep tur. «Alıans» SÓK Qazaqstan-Ózbekstan birlesken kásiporny 2019 jyldyń jeltoqsanynda «ıÝteks» AQ toqtap turǵan óndirisin iske qosty.
«Saladaǵy ózekti problemalardy sheshý maqsatynda Premer-mınıstrdiń ókimimen elimizde maqta-toqyma klasterin damytý jónindegi jol kartasy bekitildi. Sonyń sheńberinde «ıÝteks» fabrıkasynyń tolyq qýatqa shyǵýy, sondaı-aq tigin óndirisin jáne toqtap turǵan ekinshi fabrıka – «Melanjdy» iske qosý jónindegi sharalar kózdelgen.
Budan basqa, taıaýda «Ońtústik» AEA-nan tys ornalasqan maqtany qaıta óńdeý jónindegi qoldanystaǵy toqyma fabrıkalaryna arnaıy ekonomıkalyq aımaq preferentsııalaryn berýdi qarastyratyn qaýly qabyldaý josparlanyp otyr.
Bul sharalar otandyq maqtany qaıta óńdeý úlesin 3 esege ulǵaıtyp, qosymsha 1 myń jumys ornyn qurýdy qamtamasyz etedi», delingen habarlamada.
Sondaı-aq, mınıstrlik teri shıkizatyn óńdeý boıynsha kásiporyndardy qoldaý sharalaryn júzege asyrýda. Búginde alynatyn iri qara mal terisiniń barlyq kóleminen (shamamen 3 mln teri) bylǵary kásiporyndary teriniń 16 paıyzyn óńdeıdi.
«Bylǵary kásiporyndarynyń júktemesin, sondaı-aq bylǵary jáne oǵan jatatyn ónim óndirisiniń kólemin ulǵaıtý maqsatynda el aýmaǵynan óńdelmegen iri qara mal terisin shyǵarýǵa ýaqytsha tyıym salyndy. Sondaı-aq negizgi kooperatsııany eskere otyryp, sút, teri, jún qabyldaý pýnktterin qurý men damytýdy qarjylandyrýdy kózdeıtin «Birlik» nesıeleý baǵdarlamasyna ózgerister engizildi. Osy baǵdarlama aıasynda Qaraǵandy oblysynda 13 mln teńgege bir qaryz berildi, onyń ishinde 8,7 mln teńge jún óńdeý boıynsha jabdyqtar satyp alýǵa jáne 4,3 mln teńge aınalym qarajatyn tolyqtyrýǵa jumsalýy tıis», delingen habarlamada.
Jeńil ónerkásip salasynyń otandyq kásiporyndaryn, sondaı-aq fashion-ındýstrııany qoldaýǵa baǵyttalǵan osy sharalardyń barlyǵy óndirýshilerge óndiretin taýarlar nomenklatýrasyn keńeıtýge, jańa naryqtarǵa shyǵýǵa, el ishinde otandyq ónim ımıdjin arttyrýǵa jáne nátıjesinde jergilikti qamtý úlesin arttyrýǵa, jańa jumys oryndaryn qurýǵa múmkindik beredi.
