Qazaqstanda maqta qabyldaý jáne tereń óńdeý zaýyttary salynbaq
Maqtaaral aýdanynda bıyl alǵash ret maqtanyń jańa sorty – ózbekstandyq «Namagan-77» tuqymdyq shıti egildi. Ózbekstandyq «Global Textile» kompanııasymen kelissózder júrgizildi, atalǵan fırma Maqtaaralda maqta qabyldaý pýnkterin ashpaq jáne 10 myń gektar alqaptan shıkizat qabyldaýdy josparlap otyr. Al aldaǵy ýaqytta maqtany qabyldaý jáne tereń óńdeý zaýyttaryn salýdy kózdep otyr. Eń bastysy, jańa sortty aınalymǵa engizý arqyly maqtanyń asa qaýipti zııankesterine qarsy óńdeý shyǵyny azaıady, maqta ónimdiligi artyp, qosymsha tabys ulǵaıady.
Túrkistan oblysynyń ákimi Darhan Satybaldy Maqtaaral aýdanyna jumys sapary barysynda birqatar mańyzdy nysandardyń jaı-kúıimen tanysty. «Namagan-77» jańa maqta sortyn ósirýge kirisken sharýalarmen kezdesti. Atqarylyp jatqan jumystardy pysyqtady.
Sonymen qatar óńir basshysy «Qazaq maqta sharýashylyǵy ǵylymı-zertteý ınstıtýtynda bolyp, tájirıbe ortalyǵynyń jumysymen tanysty. Ǵalymdarmen júzdesti. Oblys ákimine maqta klasterin damytý, sapasyn arttyrý baǵytyndaǵy jumystar men elıtaly tuqymdyq shıt, básekege qabiletti otandyq maqta sorttary tanystyryldy. Bul baǵyttaǵy jumystardy kúsheıtý tapsyryldy.
Atalǵan salany damytý, jańa jumys oryndaryn ashý asa mańyzdy ekenin aıtqan Darhan Satybaldy, eń aldymen, maqta surpynyń sapasyn jaqsartý kerektigin atap ótti.
«Oblysymyzdy jeke tabysty arttyrý úshin jańa jumys oryndaryn ashý baǵytyna kúsh salý kerek. Bul rette maqta klasterin damytýdyń mańyzy zor. Osy salada iri fabrıka, zaýyt ashamyn deıtin azamattarǵa qoldaý kórsetýge daıynbyz. Sonymen birge, maqta ósirýde sý únemdeý tehnologııasyn meılinshe jetildirý qajet. Jalpy maqta sharýashylyǵy úlken izdenister men zertteýlerdi talap etedi. Oblys ákimdigi tarapynan maqta klasterin damytýǵa jaǵdaı jasalady. Osy baǵytta úlken josparlarymyz bar», – dedi oblys ákimi Darhan Satybaldy.
