Qazaqstanda «makaron po-flotskı» daıyndaýǵa tyıym salǵan erejeler qaıta qaralýda

ASTANA. QazAqparat - "Atameken" ulttyq kásipkerler palatasynyń qoǵamdyq monıtorıng jáne ákimshilik kedergilermen jumys departamentiniń dırektory Erbol Óstemirovtiń aıtýynsha, búginde sanıtarlyq erejelerde eskirgen, tipti, aqylǵa syımaıtyn talaptar barshylyq, dep xabarlaıdy QazAqparat tilshisi.

"Máselen, "makaron po-flotskı" jasaýǵa tyıym salynǵan, ıa bolmasa, jumyrtqadan jasalatyn omlettiń shekti qalyńdyǵy 3 santımetr dep belgilengen", - dedi Óstemirov kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń búgingi otyrysynda.

Budan bólek, otandyq kásipkerler azyq-túlikti saqtaýǵa qatysty talaptardy tym táptishtep tastaǵanyna narazy. Mysaly, qoǵamdyq tamaqtaný oryndarynda sýsymaly azyq-túlik ónimderi jatatyn sóreler qabyrǵadan 50 santımetrge alys  ornatylýy shart. Sol sııaqty mektepke deıingi nysandardaǵy ústelder kúnniń kózi túsetin qabyrǵadan bir metrge shalǵaı qoıylýy qajet. Al taqtany jerden 70 santımetrge artyq kóterýge bolmaıdy. "Qazirgi kezde mektepke deıingi nysandarǵa qatysty talaptar qaıta qaralyp jatyr. Bilim jáne ǵylym mınıstrligi 120-dan astam talapty qaıta qarap shyǵýdy surap otyr. Alaıda, naqty sheshim áli shyǵarylǵan joq", - dep atap kórsetti palatanyń ókili.

Aıta keteıik, búgingi otyrys barysynda  Bas prokýratýra aqylǵa syımaıtyn keıbir tekseristerdi jarııalady.

Prokýratýranyń departament basshysy Marat Seksembaevtyń aıtýynsha, jergilikti jerde kásipkerlerdi tekseretin organdar oıyna kelgendi istep, oryndaýǵa múldem kelmeıtin talaptardy qoıyp júr.

"Atameken" palatasy kásipkerlerge qatysty myńdaǵan talaptardyń qysqartylǵanyn málimdedi.

Al Bas prokýrordyń orynbasary Andreı Kravchenko dúkennen qatyp qalǵan nandy qalaı satyp alǵanyn aıtyp berdi.