Qazaqstanda magıstratýraǵa túsýge arnalǵan keshendi testileý bastaldy
ASTANA. KAZINFORM — Búgin, 2026 jylǵy 20 shildede magıstratýraǵa túsýge arnalǵan keshendi testileý bastaldy, ol 10 tamyzǵa deıin jalǵasady. Keshendi testileýdi tapsyrýǵa ótinishter 1 maýsym men 8 shilde aralyǵynda QR ǴJBM Ulttyq testileý ortalyǵynyń saıtynda qabyldandy.
Ǵylym jáne joǵary bilim mınıstrliginiń málimetinshe, bıyl magıstratýraǵa túsýge arnalǵan keshendi testileýge 61 myńnan astam ótinish (2025 jyly — 51 myń) qabyldandy. Eń kóp tańdalǵan bilim berý baǵyttary qatarynda «Pedagogıkalyq ǵylymdar», «Injenerlik, óńdeý jáne qurylys salalary» jáne «Bıznes, basqarý jáne quqyq» bar.
Ǵylymı-pedagogıkalyq magıstratýraǵa túsý úshin keshendi testileý elektrondyq formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Testileýge 3 saǵat 55 mınýt beriledi. Shekti ball — 75 ball, onyń ishinde shet tili boıynsha keminde 25 ball, oqýǵa daıyndyǵyn anyqtaýǵa arnalǵan test boıynsha — keminde 7 ball, bilim berý baǵdarlamalary tobynyń beıini boıynsha: birinshi beıindi pán boıynsha — keminde 7 ball, ekinshi beıindi pán boıynsha — keminde 7 ball.
Beıindi magıstratýraǵa túsýge nıetti túsýshiler tek bilim berý baǵdarlamalary tobynyń beıini boıynsha test tapsyrady. Shekti ball keminde 30 ball, onyń ishinde birinshi beıindi pán boıynsha — keminde 7 ball, ekinshi beıindi pán boıynsha — keminde 7 ball.
— Testileý nátıjelerimen kelispegen jaǵdaıda onlaın-apellıatsııa berýge bolady. Testilenýshi emtıhan aıaqtalǵannan keıin 30 mınýt ishinde apellıatsııaǵa ótinish bere alady. Apellıatsııa 7 jumys kúni ishinde qarastyrylady, odan soń sertıfıkat oqýǵa túsýshiniń Jeke kabınetinde qoljetimdi bolady, — delingen habarlamada.
Eske salaıyq, magıstratýrada oqý úshin 2026 jyly 11 myńǵa jýyq grant bólingen. Kadrlardy daıarlaýǵa arnalǵan granttar suranysqa ıe baǵyttar boıynsha bólinedi.
Grant konkýrsyna qujattardy qabyldaý 12-18 tamyz aralyǵynda júzege asyrylady, al grant ıegerleriniń tizimi 25 tamyzǵa deıin jarııalanady. Bolashaq magıstranttardy JJOKBU-ǵa qabyldaý 28 tamyzǵa deıin deıin júrgiziledi.
