Qazaqstanda maǵan kórsetilgen asa zor iltıpat oılaǵanymnan da asyp tústi - koreılik kıno ártisi Son Il Gýk
Joǵary deńgeıde kelisilgen sheshim boıynsha bıyl Qazaqstandaǵy Koreı jyly atap ótiledi. Soǵan oraı, 5 mamyr kúni Astanada Qazaqstandaǵy Koreı jylynyń saltanatty ashylýy boldy. Saltanatty sharaǵa koreı eliniń estrada jáne kıno juldyzdary arnaıy keldi. Olardyń arasynda qazaqstandyq kınosúıer qaýymǵa «Hanzada Jýmong» telehıkaıasy arqyly jaqsy tanys ártis - Son Il Gýk bar. Ártis Astanaǵa aıaq basqan birinshi kúni óziniń fanattaryna qoltańbasyn taratty. Qalyń jurttyń aldyna sýyrylyp shyǵyp qoltańbany birinshi bolyp alǵan aqjaýlyqty ájeıimizdiń qýanyshynda shek bolmady. Qoltańba taratýdy shamamen bir jarym saǵatta aıaqtaý josparlanǵan bolatyn, biraq jankúıerler súıikti ártisin jibermeı, bas-aıaǵy úsh saǵattan astam ýaqyt ustady. Kelesi kúni koreılik juldyzdardy bir kórip qalýdy armandaǵan astanalyqtar Qazaqstandaǵy Koreı jylynyń saltanatty ashylý kontsertine aǵyldy. Ol kúni 3,5 myń orynǵa eseptelgen Astananyń eń úlken - «Qazaqstan» Ortalyq kontserttik zalynyń aýzy-murny lyq toldy. Syımaı qalǵan júzdegen adam Ortalyq kontserttik zaldyń kireberis esikterin sharanyń sońyna deıin kúzetip turdy. Mundaı anshlag ótken jyly Gollıvýdtyń mańdaıaldy ártisteri kelgen Eksh-fılmderdiń «Astana» kınofestıvalinde de bolmaǵan. Otandyq ónersúıer qaýymnyń koreılik juldyzdarǵa degen ystyq yqylastaryn eskere kele, keshtiń basty keıipkeri - Son Il Gýktyń birneshe buqaralyq aqparat quralyna, sonyń ishinde «QazAqparat» agenttigine bergen suhbatyn qaz-qalpynda usynýdy jón kórdik.
- Son Il Gýk, qoltańbańyzdy alýǵa kelgen fanattaryńyzdyń sanyn kórdińiz. Qazaqstanda osynshama jankúıerdi tostyńyz ba?
- Ótken jyly men, Qazaqstan Prezıdenti Nursultan Nazarbaevtyń Koreı Respýblıkasyna jasaǵan sapary qurmetine arnalǵan resmı qabyldaýǵa shaqyryldym. Bul shaqyrý qazaqstandyq taraptyń bastamasymen bolǵandyqtan, meni Qazaqstanda jaqsy kóretinin sonda sezindim. Koreı elindegi qazaqstandyq BAQ-pen bolǵan suhbatymda da jýrnalıster Qazaqstandaǵy tanymaldyǵym týraly jáne meni onda jaqsy kóretinin aıtqan bolatyn. Al mynda kelgennen keıin, birinshiden - jyly qabyldaý, ekinshiden, jankúıerlerdiń mol sany oılaǵanymnan da asyp tústi. Men qazaqstandyqtarmen júzbe júz kezdeskim keldi, sondyqtan Astananyń tabaldyryǵyn attaı sala bazarǵa bardym. Bazarda meni birden tanydy, adamdar maǵan: «Jýmong»,- dep aıqaılap jatty. Jankúıerlerime rahmet! Ártistiń tanymal bolýynyń asa bir ereksheligi, seni eshkim tanymasa rólderge de shaqyrylmaısyń. Sondaı-aq aıta keteıin, meniń Qazaqstanda bir tanysym bar - Áıgerim Aıdarova. Ol qazir Koreıada Son Kıýn Kýan ýnıversıtetinde oqıdy. Men onymen «Chosun Ilbo» gazeti uıymdastyrǵan suhbat barysynda tanystym. Odan keıin biz dos bolyp kettik. Ol maǵan Qazaqstan tarıhy týraly aıtyp berdi, tipti qazaqsha bir-eki aýyz sóz de úıretti.
- Sonda qaı bazarǵa bardyńyz?
- Shanhaıǵa. Negizi bazarǵa barý josparda joq edi. Biraq bazardyń janynan mashınamen ótip bara jatyp, ony kórgim kelip ketti.
- Birdeme satyp ala aldyńyz ba, azyq-túlik degendeı...?
- Jemis-jıdekter men jańǵaq satyp aldym. Jalpy qurǵaq klımatta ósken jemis-jıdekter óte dámdi bolady.
- Bilýimizshe, bul Qazaqastanǵa alǵashqy saparyńyz emes.
- Iá, Qazaqstan jerine alǵash ret úsh jyl buryn aıaq attap bastym. Men Qazaqstan arqyly Qyrǵyzstanǵa bardym. Ol kezde Almatyny ǵana kórý múmkin boldy, osy joly Astanany da tamashaladym. Almaty eski, mádenı qala, al Astana jas bolǵanymen óte qarqyndy damyp kele jatqan zamanaýı qala.
- Sizdi Qazaqstanda tanymal etken «Hanzada Jýmong» telehıkaıasy. Bul rólge qalaı shaqyryldyńyz jáne serıaldy túsirý barysynda qandaı da bir qyzyqty epızodtar boldy ma?
- Biletin bolsańyzdar, «Koreıa» sóziniń túbirinde onyń ejelgi ataýy -«Kogýre» ataýy jatyr. Kogýreny jaýdan azat etken naq sol Jýmong bolatyn. Árbir koreıliktiń kóńiline Kogýre kezeńi eline degen maqtanysh pen qamqorlyqty uıalatady. Sondyqtan azatker Jýmongtyń rólin kez kelgen ártiske usynsa ol oılanbastan qabyldar edi. Bul róldi maǵan usynǵanda men de qýana-qýana kelistim. Men úshin bul úlken qurmet.
«Hanzada Jýmong» serıalyn túsirgen kezde qyzyqty jáıttar boldy. Ózderińiz kórgendeı onda at ústindegi jáne sadaq atý epızodtary óte kóp. Sondaı bir sátterdi túsirý kezinde men attan ońbaı qulap, ólim qusha jazdaǵanmyn. Taǵy bir oqıǵa, alǵashynda sadaqty durys atpaı, atqan jebem túsirý tobynyń kóligine tıgen bolatyn. Sóıtip, mashınaǵa estelikke tesik qaldyrdym.
- Sizge qazaqstandyq kınosúıer qaýym arasynda tanymaldylyq alyp kelgen taǵy bir serıal - «Teńiz patshasy». Bul fılmge qalaı keldińiz?
- Negizi bul róldi basqa tanymal ártis oınaýy kerek bolatyn. Biraq onyń sol ýaqyttaǵy jeke basynyń jaǵdaıyna baılanysty, rólge men shaqyryldym. Men onda jaǵymsyz jáne ekinshi plandaǵy róldi oınadym. Soǵan qaramastan kórermenderdiń kóńilinen shyqtym.
- «Teńiz patshasynda» jaǵymsyz keıipkerdiń rólin somdasańyz da sizge osy serıal erekshe ystyq ekenin bilemiz. Nelikten?
- Birinshiden, serıaldyń túsirilimderi óte kúrdeli jáne qıyn boldy. Men úshin de olar ońaıǵa soqqan joq. Kez kelgen adamǵa mańdaı termen kelgen dúnıe ystyq qoı. Ekinshiden, naqty osy serıal maǵan ártis retinde ataq alyp keldi. Sonymen birge, osy serıalǵa túsip jatqan kezimde otbasymnyń jaǵdaıy birshama aýyr bolatyn, osy serıaldan keıin men aıaǵymnan turyp kettim.
- Ártis retinde Qazaqstannyń kınoındýstrııasymen tanyssyz ba? Múmkin bizdiń rejısserlar túsirgen kartınalardyń bireýin kórgen bolarsyz?
- Ókinishke qaraı, qazaqstandyq fılmderdi kórýge múmkindik týmady. Ótken jyly Koreıadaǵy Qazaqstan jyly aıasynda qazaqstandyq kınonyń festıvali ótti, onda «Stalınge syı» kınosy kórsetildi. Biraq ol ýaqytta men kezekti serıaldyń túsiriliminde júrdim. Biraq osy joly Qazaqstannan Koreıaǵa oralǵanda osy kınony mindetti túrde kórýge bel býyp otyrmyn.
- Qazaqstandyq-koreılik birlesken fılmge túsýge keliser me edińiz?
- Árıne. Qarsy bolmas edim.
- Koreıde telehıkaıalardy túsirý jaqsy damyǵan. Olardy túsirý úderisi qalaı júredi? Serıaldar túsirilip jatyp ekranǵa birden shyǵarylyp otyrady ma, álde túsirilim tolyq aıaqtalysymen, montajyn tııanaqtap jasap bolǵan soń jiberesizder me?
- Meniń bilýimshe, Japonııa men AQSh-ta serıaldar kórermenderdiń nazaryna tolyq túsirilip bolǵannan keıin usynylady. Koreı elinde júıe basqasha. Biz hıkaıalardyń 20-30 paıyzyn túsiremiz de ekranǵa shyǵara beremiz. ıAǵnı bir aptaǵa aldyn ala túsirip otyramyz. Sol arqyly kórermenderdiń kóńil-kúıin baqylaımyz jáne soǵan qaraı stsenarııdi ózgertip otyramyz. Koreılik serıaldardyń tanymal bolýy da sol sebepti. Biraq mundaı júıeniń óziniń qaýipteri de bar.
- «Hanzada Jýmong» serıaly da solaı túsirildi me?
- Iá, Qytaıda 2 aı boıy júrgizilgen túsirilimderdi eskermegende, osy júıe boıynsha túsirildi. Aldaǵy eki aptaǵa aldyn ala túsirip otyrdyq.
- Serıaldar kóbine qandaı qarajatqa túsiriledi jekemenshik pe, álde memlekettik pe?
- Kóbinese jekemenshik qarajatqa, memlekettik bıýdjetten túsiriletini kem de kem.
- Qazir qandaı jańa kınolarǵa túsip jatyrsyz?
- Birer kún buryn «Krımınal bólimi» atty kezekti serıaldyń túsirilimi aıaqtaldy. Mamyr aıynyń ortasynda Koreıa táýelsizdigi úshin kúresken jaýynger týraly syr shertetin spektaklde oınaımyn. Budan keıin taǵy bir kınoǵa túsýim josparlanyp otyr. Ázirshe onyń ataýyn bilmeımin.
Aıtqandaı, qolymdaǵy júzikti kórip otyrǵan shyǵarsyzdar. Ony maǵan keshe Koreı eliniń Qazaqstandaǵy Elshisiniń rezıdentsııasynda osynda turatyn koreı apaı berdi. Ol Koreıdiń azattyǵy úshin kúresken jaýyngerdiń urpaǵy eken.
- Buǵan deıin somdaǵan rólderdiń ishinde qaısysy janyńyzǵa etene jaqyn jáne qandaı keıipkerdi oınaǵandy unatasyz, jaǵymdy ma álde jaǵymsyz ba?
- Unatatyn qandaı da bir rólim joq. Maǵan stsenarıı unasa boldy. Menińshe, jaǵymsyz keıipker róliniń óziniń ereksheligi bar. Men telehıkaıalardaǵy rólimdi jaǵymsyz keıipkerlerdi somdaýdan bastadym. Biraq fılmniń sońyna qaraı keıipkerimniń minezi ózgerip, ol jaǵymdy keıipkerge aýysatyn. Mysalǵa «Teńiz patshasy» jáne «Mahabbat shyrmaýy» serıaldaryndaǵy rólderim sondaı boldy.
- Gollıvýd ártisteriniń qaısysyn qurmet tutasyz?
- Men ártisterdiń barlyǵyna qurmetpen qaraımyn. Gollıvýdta kelbetterinen óń, boılarynan shymyrlyq ketpegen 60-70 jastaǵy ártister bar. Koreıada ondaı ártister joq. Ádette mundaı jastaǵy ártister ekran betinen birtindep syrǵytylyp túse beredi. Biraq men 60-70-ke kelsem de symbattylyǵymdy saqtap qalýǵa tyrysatyn bolamyn.
- Ózińizdi rejısser retinde synap kórgińiz kelmeı me, kıno túsirý oıyńyzda joq pa?
- Joq. Men tek ártispin.
- Siz kishkentaı kezińizde ártis emes dızaıner bolǵyńyz kelgenin bilemiz. Qalaǵan jolyńyzben barmaı sahnaǵa kelýińizdiń sebebi nede?
- Iá, balalyq shaǵymda dızaıner bolǵym keldi. Biraq baǵym janbaı bul mamandyq boıynsha ýnıversıtetke túse almaı qaldym. Sonda tanystarym sahnany tanýǵa jol ashatyn basqa mamandyqqa túsýge keńes berdi. Ártis te, dızaıner de sahna mamandyqtary. Sondyqtan teatr fakýltetine tústim.
- Óz jasyńyzdan tym jas kórinesiz. Sizdiń ustanatyn dıetańyz Koreıadaǵy qyzdardyń arasynda tanymal. Ajarly kelbetińiz ben dene symbattylyǵyńyzdyń syry nede?
- Densaýlyǵymnyń basty syry - men eshqashan shylym shekpeımin jáne alkogoldi aýzyma tatyp almaımyn. Sondaı-aq men vegeterıandyqpyn. Etti jemegenime 10 jyl boldy. Biraq maǵan keshe Astanada qoı etinen jasalǵan káýap daıyndap qoıypty. Jegim kelgeni sonshalyq óz-ózimdi áreń ustadym. Onymen birge, únemi sportpen shuǵyldanýǵa tyrysamyn, ásirese, trıatlonmen. Bul sport túrin úıretken Koreıadaǵy jattyqtyrýshym Qazaqstannan bolatyn. Jáne de men ómirge qashan da optımıstik turǵyda qaraımyn.
- Sizdiń jubaıyńyz sýdıa. Sýdıa men ártis qalaı kezdesti? Jáne bilýimizshe, balalaryńyz joq. Qansha balańyz bolǵanyn qalaısyz?
- Meni bolashaq áıelimmen jýrnalıster tanystyrdy. 1,5 jyldan keıin biz otaý qurdyq. Árıne, kóp balamnyń bolǵanyn qalaımyn.
- Dinı senimińiz qandaı?
- Men - hrıstıanmyn.
- Sizdiń anańyz saıasatker, al atańyz týraly kóptegen fılmder túsirildi. Kópshilikke tanymal tegińiz úlken jaýapkershilik júkteıtin shyǵar?
- Iá, meniń anam ártis bolǵan. Qazir saıasatpen aınalysady, depýtat. Atam Koreıa tarıhyndaǵy belgili adam. HH ǵasyrdyń basyndaǵy táýelsizdik jolyndaǵy qozǵalystyń basynda turǵan, japon basqynshylaryna qarsy kúresken general Kım Chja Chjınniń shóberesimin. Ol týraly derekti fılmder túsirilgen, tarıh páni oqýlyqtarynda da arǵy atam týraly málimetter kezdesedi.
Árıne, men úlken jaýapkershilikti sezinemin. Ol jaýapkershilik týraly maǵan aıtatyndar da kóp...
- Taǵdyrǵa senesiz be jáne ata-anańyz yrymdap bergen esimińiz úlken baqytqa jol asha aldy dep oılaısyz ba?
- «Song» - meniń tegim, esimimniń eki ortasyndaǵy syzyqsha - «bir», «Gýk» - memleket degen maǵynany bildiredi ıaǵnı, bir memleket. Men 1 qazanda týǵannan keıin, esimim Koreıde osy kúni atap ótiletin - Áskerıler kúnimen baılanysty. Sondyqtan tanystarym meniń týǵan kúnimdi eshqashan umytpaıdy. Men bútin bir memleketti «aq bilektiń kúshimen, aq naızanyń ushymen» qorǵap qalǵan batyr - Jýmongtyń rólin somdadym. Taǵdyryma rızamyn, alǵa qoıǵan maqsatym oryndaldy dep esepteımin.