Qazaqstanda lýdomanııa jaıly fılm jaryqqa shyǵady
ASTANA. KAZINFORM – 15 mamyrdan bastap elimizdiń kınoteatrlarynda «Igromanka» atty fılm jaryqqa shyǵady. Búgin elordada kınotýyndynyń jabyq kórsetilimi ótti.
Fılmde bás tigýge qumar áıeldiń taǵdyry baıandalady, onyń ústine keıipker ishimdikke táýeldi bolady. Áıeldiń jalǵyz uly bar, taǵdyry shytyrman, ulynan aırylǵysy kelmeıdi, biraq, táýeldilikten aryla almaıdy. Osylaısha kúres uzaqqa sozylady.
- Bul fılmniń stsenarııi 2 jyl buryn meniń qolyma tıdi. Bul – mańyzdy taqyryp, ıaǵnı oıynqumarlyq kún tártibindegi máseleniń biri, ekinshiden bas keıipker – áıel. Bul – bizdiń qoǵamda sırek kezdesetin jaıt. Sondyqtan bul kartınany qýana qabyl aldym. Fılm barlyq aýdıtorııaǵa arnalǵan, otbasymen birge kórýge de bolady. Keıbireýler fılmdi kórip, ózin tanyp, sheshim qabyldaýy múmkin. Fılm stsenarııin jazý, tanysý barysynda Qazaqstanda qumar oıynǵa áýes jandardyń kóp ekenin bildik. Sebebi oıyn, bás túgý qoljetimdi, onyń ústine ashyq jarnamalaıdy, al ár oıynnyń artynda adam taǵdyry tur. Sondaı-aq lýdomanııadan arylý, ońaltý qıyn ári uzaq protsess. Biz kartınada basty keıipker arqyly sol problemany kórsetýge tyrystyq, - dedi fılm rejısseri Aldııar Baırakımov jabyq kórsetilim barysynda.
Túsirilim bir aıǵa sozylǵan jáne fılm Astanada, Býrabaı, Şýchede túsirilgen.
- Fılmde basty róldi somdaý úshin kastıngten birneshe ret óttim jáne úmitkerler kóp boldy. Bul kartına maǵan kásibı tájirıbeden bólek, ómirlik sabaq boldy. Lýdomannyń keıpin keshkendeı boldym jáne oıynqumar emestigime táýbá ettim. Men ózim Germanııada turamyn, Qazaqstanǵa osy fılmge túsýge keldim, túsirilim toby aýqymdy jumys istedi jáne uıymshyl. Túsirilim óte qyzyqty ótti, jazda masaǵa da talandyq, qysqa -40 gradýs aıazda kameramyz qatyp qaldy, boran bolyp jolda qaldyq. Bul fılmniń taǵy bir ereksheligi, táýeldilik problemasy týraly týyndylarda kóbine er adamdardyń taǵdyry beınelenedi, al áıeldiń qumar oıynǵa basqa da jat qylyqqa táýeldi bolýy múldem bólek jaıt. Sebebi áıel – otbasynyń berekesi, áıel buzylsa, otbasynyń quty ketedi, - deıdi basty róldi somdaǵan ártis Gýzel Jan.
Kınotýyndyda qazaq-orys tili aralas órbıdi jáne aýdarmasy qatar júredi. Sondaı-aq avtorlar fılmdi kórýdi 14 jastan joǵary aýdıtorııaǵa usynyp otyr.
- Lýdomanııa – úlken qasiret, emdeletin dert, biraq statıstıkaǵa qarasaq, elimizde 400 myń azamat osy zulmatqa táýeldi eken. 400 myń adamnyń artynda otbasy tur, bul bizdiń halyq úshin aýyr problema. 2023 jyly shyǵarmashylyq ujym osy taqyrypty usynǵan kezde sarapshylar keńesiniń barlyq múshesi qýana qoldady. Sebebi bul qoǵamda bar problema, ony kórsetýimiz kerek, qumar oıynnan aýlyq bolý kerektigin elge jetkizý kerek. Bul taqyryp bizdiń ortalyq qoldaıtyn basty baǵyttardyń biri, - dedi Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı.
Aıta keteıik, fılm Mádenıet jáne aqparat mınıstrliginiń tapsyrysy boıynsha jáne Ulttyq kınony qoldaý memlekettik ortalyǵynyń qoldaýymen túsirildi.
Bıyl naýryzdaǵy málimetke sáıkes, elimizde 350 myń adam qumar oıyndy júıeli túrde oınaıdy.