Qazaqstanda lotereıalyq naryq tıimdiligi óte tómen

ASTANA. QazAqparat - Qazaqstanda lotereıalyq naryq tıimdiligi óte tómen. Bul týraly búgin QR Parlamenti Senatynyń jalpy otyrysynda «Lotereıalar jáne lotereıa qyzmeti týraly» QR Zańy qabyldaý barysynda málim boldy.

«Búkil álemde lotereıa qumarlyq elementi bar eń alǵashqy jáne neǵurlym keń taralǵan oıyn túri. Qazirgi tańda lotereıa óz ıdeologııasy boıynsha qumar oıyndar túrinen barynsha alshaqtanyp kele jatqan derbes sala. Lotereıanyń memleketpen tyǵyz baılanysynyń arqasynda, sonymen birge qumarlyǵy men áleýmettilik baǵyttylyǵy boıynsha dúnıejúzine keń taralýdy. Alaıda, Qazaqstanda lotereıalyq naryq tıimdiligi óte tómen bolyp otyr. Onyń áleýeti de damýǵa sáıkes emes. Buǵan jeke zańnyń bolmaýy da áser etýde», - dedi Mádenıet jáne sport mınıstri Arystanbek Muhamedıuly.

Onyń aıtýynsha, zań jobasynyń aıasynda lezdik jáne tırajdyq lotereıalardy ótkizýdiń quqyqtyq negizi qalanady. Lotereıany uıymdastyrý men ótkizý Úkimet aıqyndaıtyn Ulttyq operatorǵa júkteletin bolady. Sonymen qatar, lotereıa operatory bolyp tabylmaıtyn ózge tulǵalardyń lotereıa ótkizýine tyıym salynady. «Lotereǵa qatysýshylardyń utys múmkindiginiń teńdigi, utys oıyn nátıjelerin mindetti túrde baspasóz betterine shyǵarý kózdeledi. Lotereıanyń júlde qorynyń mólsherin elý paıyzǵa qalyptastyrý tártibine talaptar bekitiledi», - dedi mınıstr.

Budan bólek, lotereıa operatorynyń lotereıa bıletterin ótkizýden túsken túsim men júlde qory arasyndaǵy aıyrmanyń on paıyzy mólsherindegi aýdarymdardy tóleý sharasy da qarastyrylady.

«Lotereıadan túsken paıda boıynsha aıyrmadan on paıyzǵa aýdarym jasaý arqyly alynǵan qarajat sportty damytýǵa joldanatyn bolady», - dedi A. Muhamedıuly.