Qazaqstanda lotereıa jeńimpazy belgili tulǵalarmen keshki as ishedi

ASTANA. QazAqparat - «Bolashaq» qaýymdastyǵy Qazaqstan táýelsizdiginiń 25 jyldyǵyna arnalǵan «25 ıgi is» sharasy aıasynda jańa lotereıa oıyn ótkizedi. Onyń jeńimpazy elimizge belgili tulǵalarmen keshki as ishe alady.

«Elimizge tanymal tulǵalardyń qatysýymen «Bolashak lunch» qaıyrymdylyq lotereıasy josparlanǵan. Lotereıaǵa qatysýshylar kimmen as ishkisi keletinin tańdap, ǵalamtordaǵy arnaıy paraqshadan bıletter satyp ala alady. Kezdeısoq sandar generatory jeńimpazdy tańdaıdy. Qaıyrymdylyq sharasynda túsken barlyq qarajat bilim berý baǵdarlamalaryn qoldaýǵa baǵyttalady», - delingen qaýymdastyq taratqan habarlamada.

Jalpy, «25 ıgi is» jobasy segiz baǵytty qamtıdy. Osylaısha, jastar kásipkerligin qoldaý baǵyty boıynsha Almatyda «Bolashak Business» bıznes-forýmy men «Startup «Bolashak» startap-jobalar baıqaýyn ótkizý josparlanǵan.

Qoǵamdyq birlestikterdi, áleýmettik qorǵalmaǵan turǵyndardy qoldaýǵa nazar aýdarady. Tegin keńes berip, oqytyp, quqyqtyq jáne tehnıkalyq kómek (veb-saıttardy qurý) kórsetedi.