Qazaqstanda lotereıa qyzmeti salyqtan bosatylýy múmkin

ASTANA. QazAqparat - Qazaqstanda lotereıa oıyndaryn uıymdastyrý qyzmetin qosylǵan qun salyǵynan bosatý usynyldy, dep habarlaıdy QazAqparat tilshisi.

Búgin QR Ádilet mınıstrligi janyndaǵy zań jobalaý qyzmeti máseleleri jónindegi vedomstvoaralyq komıssııanyń kezekti otyrysynda  QR Mádenıet jáne sport mınıstrliginiń jaýapty hatshysy Qýatjan Ýálıev lotereıalar jáne lotereıa qyzmeti máseleleri boıynsha keıbir zańnamalyq aktilerine ózgerister men tolyqtyrýlar engizý týraly baıandaǵan.

Onyń aıtýynsha, 2017 jyldyń 25 jeltoqsanynda elimizdiń jańa Salyq kodeksi qabyldanyp,  soǵan sáıkes lotereıa bıletterin satý aınalymyna qosylǵan qun salyǵy salynǵan. Qazirgi ýaqytta qosylǵan qunǵa salyq operatordyń utysty tólegennen keıingi túsimine salynady. Al ol ádette júlde qorynyń somasyna teń bolyp keledi.

«Іs júzinde lotereıa operatoryna túsetin qarjylyq júkteme bylaı bolyp otyr: barlyq túsimniń keminde 50 paıyzy júlde qoryna ketedi, al qalǵan 50 paıyzdan keminde 10 paıyzy sportty damytýǵa, 12 paıyzy QQS-ke jáne 20 paıyzy shyǵystardy alyp tastaǵannan keıingi korporatıvtik tabys salyǵyna ketedi», - dedi ol.

Jaýapty hatshynyń aıtýynsha, lotereıa operatory qalǵan soma esebinen jalaqy tóleý, barlyq ІT-ınfraqurylymdardyń jumys isteýin qamtamasyz etý syndy aǵymdyq shyǵyndaryn jabýy qajet.  Sonymen qatar ol Kanada, Italııa, Ulybrıtanııa, AQSh jáne Polsha syndy elderde lotereıa bıletterin satý aınalymy qosylǵan qun salyǵynan bosatylǵan.

Aıta keteıik, 2017 jyldyń 10 aqpanynda QR Úkimetiniń qaýlysymen «Sátti juldyz» AQ lotereıa operatory bolyp aıqyndalǵan edi.