Qazaqstanda lor dárigerleri jetispeıdi - Ájenov
ASTANA. QazAqparat - Qazaqstanda lor dárigerleri jetispeıdi. Bul jaıynda QR Prezıdenti Іs basqarmasy medıtsınalyq ortalyǵynyń Ortalyq klınıkalyq aýrýhanasy hırýrgııalyq bólimshesiniń meńgerýshisi, medıtsına ǵylymdarynyń doktory Talapbek Ájenov aıtty, dep habarlaıdy QazAqparat.
«Áli kúnge deıin elimizde lor-dárigerlerdiń jetispeýshiligi baıqalady. Ásirese, balalardy emdeıtin lor dárigerler óte az. Buǵan qosa, kóptegen oblys ortalyqtarynda, máselen, Aqtaý, Qyzylorda, Atyraý, Semeı syndy óńirlerdiń emhanalarynda lor bólimderi qysqaryp nemese jabylý ústinde. Munyń basty sebebi jasalatyn otaǵa tólenetin aqsha deńgeıiniń tómendiligi bolyp otyr. Al ota jasaýǵa qajetti medıtsınalyq quraldar men jabdyqtardyń quny kóterilip ketken. Sol sebepti qazirgi naryqtyq ekonomıka jaǵdaıynda kez kelgen aýrýhananyń basshylary úshin ondaı zamanaýı qural-jabdyqty satyp alý tıimsiz. Sondyqtan da qazirgi ýaqytta mundaı operatsııalar jasaý tek úlken ortalyqtarda, Astana men Almaty qalalarynda nemese aqyly medıtsınalyq ortalyqtarda ǵana tıisinshe baǵamen jasalatyn bolǵan», - dedi ol.
Onyń atap ótýinshe, qulaq, muryn aýrýlaryn dıagnostıkalyq tekserýge arnalǵan negizgi apparattar men operatsııaǵa qajetti quraldardyń eń jaqsysy eýropalyq sanalady. Degenmen, sońǵy ýaqyttarda Izraıl, Ońtústik Koreıa da bul salada birshama ilgerilep otyr. Alaıda, sońǵy jyldary teńgeniń dollarǵa shaqqandaǵy baǵamynyń kúrt ózgerýine baılanysty bul apparattar men medıtsınalyq qural-jabdyqtardyń quny eki esege ósti.
«Sol sebepti kez kelgen medıtsınalyq mekemeniń ondaı qural-jabdyqty satyp alýǵa shamasy jete bermeıdi. Buǵan qosa, olarmen jumys isteıtin mamandar tapshylyǵy da bar. Ony sheshý joly - dárigerlerdiń shetelde tájirıbe jınaýyna, bilim alýyna jaǵdaı jasaý. Al ol úshin eń aldymen dárigerler til meńgergeni jón. Shetelde bilim alyp, tájirıbe jınaqtap kelgen dárigerlerdi óńirlerge jiberip, óz tájirıbesimen bólisýine jaǵdaı jasaý da jón bolar edi»,- dedi Ájenov.
Onyń aıtýynsha, QR Prezıdenti Іs basqarmasy medıtsınalyq ortalyǵynyń Ortalyq klınıkalyq aýrýhanasy Ortalyq Azııa aýmaǵyndaǵy aldyńǵy qatardaǵy mekeme sanalady. Sonymen birge medıtsınasy óte joǵary deńgeıde damyǵan álemniń Germanııa, Izraıl, Polsha, Ońtústik Koreıa syndy elderimen de tyǵyz yntymaqtastyq ornatqan.
«Bizde lor operatsııalarynyń ońaıynan bastap eń kúrdelilerine deıin jasalady. Qazaqstannyń túkpir-túkpirinen kelgen naýqastarǵa da kómek kórsetip jatyrmyz. Qazirgi kúni kezekte turǵan naýqastar sany 100-den asady»,- dedi medıtsına ǵylymdarynyń doktory.
