Qazaqstanda lokomotıv parki 72 jańa tehnıkamen tolyqty
ASTANA. KAZINFORM — Jyl basynan beri QTJ lokomotıv parki 72 birlik jańa tartý tehnıkasymen tolyqty. Wabtec jáne CRRC kompanııalarynyń magıstraldyq teplovozdary, Alstom elektrovozdary, sondaı-aq CRRC manevrlik teplovozdary paıdalanýǵa berildi.
Qazirgi zamanǵy lokomotıvter Astana, Qyzylorda, Qaraǵandy, Atyraý, Mańǵystaý, Pavlodar, Maqat, Ekibastuz, Jem jáne Balqashtyń lokomotıv paıdalaný depolaryna bólingen.
— Lokomotıv parkin jańartý poıyzdar qozǵalysynyń qaýipsizdik deńgeıin arttyrýǵa, jyljymaly quramnyń paıdalaný sıpattamalaryn jaqsartýǵa jáne lokomotıv brıgadalary úshin neǵurlym qolaıly eńbek jaǵdaılaryn jasaýǵa múmkindik berdi. Jańa lokomotıvter zamanaýı mıkroprotsessorlyq basqarý júıelerimen, «Bort» júıesimen, beınebaqylaý quraldarymen, sondaı-aq tasymaldaý protsesiniń senimdiligi men tıimdiliginiń joǵary deńgeıin qamtamasyz etetin zamanaýı radıobaılanys keshenderimen jabdyqtalǵan, — delingen ulttyq kompanııanyń habarlamasynda.
Paıdalanýǵa berilmes buryn barlyq tehnıka keshendi túrde zerthanalyq jáne tehnıkalyq synaqtardan ótkizildi.
Eske sala keteıik, buǵan deıin Qazaqstan temir joly alańynda temirjol vokzaldaryn jańǵyrtýdy úılestirý jáne jedeldetý jónindegi jedel shtab qurylǵanyn jazdyq. Onyń quramyna jergilikti atqarýshy organdardyń, tehnıkalyq jáne avtorlyq qadaǵalaýdyń, merdigerlik uıymdardyń jáne kompanııanyń beıindik bólimsheleriniń ókilderi kirdi.
