Qazaqstanda lıtsenzııasy joq býkmekerlik keńselerdiń ınternet resýrstary buǵattalady
ASTANA. KAZINFORM – Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy men ilispe qujattyń jobasy kelip tústi.
«Zań jobalary Memleket basshysynyń qumar oıyndarǵa zań júzinde shekteý qoıý týraly tapsyrmasynyń aıasynda Parlament depýtattarynyń bastamasymen ázirlendi. Bul qujattardaǵy negizgi jańalyqtarǵa toqtalsaq, býkmekerlik keńseler men totalızatorlardyń jarnamasyn ǵımarattarda, bılbordtarda, BAQ-ta, kólikterde ornalastyrýǵa jáne taratýǵa tyıym salý jóninde norma qarastyrylǵan. Sonymen qatar, basqa da jerdegi jarnamasyn shekteý usynyldy», - dedi Májilis depýtaty Ashat Aımaǵambetov palatanyń jalpy otyrysynda.
Ekinshiden, boryshkerlerdiń biryńǵaı tiziminde turǵan azamattar úshin qumar oıyndarǵa qatysýǵa tyıym salý eskerilgen.
«Munymen qosa, lıtsenzııasy joq sheteldik býkmekerlik keńselerdiń, totalızatorlardyń ınternet resýrstaryna tyıym salyp, olardy buǵattaý usynyldy. Zań buzǵan oıyn bıznesin uıymdastyrýshylar úshin ákimshilik jáne qylmystyq jaýapkershilik engizý sııaqty basqa da normalar qarastyrylǵan. Sondyqtan Májilistiń Áleýmettik-mádenı damý komıteti atalǵan jobalary boıynsha tıisti qorytyndy ázirleýge daıyn», - dedi depýtat.
