Qazaqstanda lıtsenzııalanǵan qansha maıner bar
ASTANA. KAZINFORM – 470 myńǵa jýyq maınıng jabdyǵy esepke alyndy. Bul týraly Úkimet otyrysynda Jasandy ıntellekt jáne tsıfrlyq damý vıtse-mınıstri Ǵızzat Baıtursynov málim etti.
- 2023 jyly «Tsıfrlyq aktıvter týraly» zań kúshine endi. Oǵan deıin memlekette maınerler óndirgen tsıfrlyq aktıvterdiń kólemi, paıdalanylatyn jabdyqtary jáne salanyń jalpy aýqymy týraly tolyqqandy aqparat bolmaǵan. Osyǵan oraı zań aıasynda tsıfrlyq maınerlerdi lıtsenzııalaý júıesi engizilip, maınıng pýldardy akkredıtteý jáne maınıng jabdyqtaryn esepke alý jolǵa qoıyldy. Búginde elimizde 76 lıtsenzııalanǵan maıner, 5 akkredıttelgen maınıng pýl bar. 470 myńǵa jýyq maınıng jabdyǵy esepke alyndy. Eń bastysy, qazir maınıng pýldar bizge óndirilgen tsıfrlyq aktıvter týraly aqparatty turaqty túrde usynady. Sonyń nátıjesinde memlekette salanyń naqty kólemin jáne odan ári damý kórsetkishterin júıeli túrde baqylaýǵa múmkindik paıda boldy, - dedi Ǵ. Baıtursynov.
Onyń sózine qaraǵanda, 2025 jyly maınıng pýldar arqyly shamamen 3 600 bıtkoın óndirildi, ıaǵnı 2023 jylmen salystyrǵanda óndiris kólemi 4 ese ósti.
- Salyq túsimderi boıynsha da aıtarlyqtaı ósim bar. 2023 jyly saladan bıýdjetke 9 mlrd teńge tússe, 2025 jyly bul kórsetkish 22,4 mlrd teńgege jetti. Bul rette salalyq túsimderi 2,5 esege jýyq ósti. Bul – engizilgen júıeniń naqty nátıjesi. Maınerler esepke alyndy, óndirilgen tsıfrlyq aktıvterdiń kólemi aıqyndaldy, al bıýdjetke túsetin salyq kólemi artty, - dedi vıtse-mınıstr.
Buǵan deıin Qazaqstanda krıptoamnıstııa men maınıngke qatysty jańa erejeler usynylǵanyn jazǵan edik.
