Qazaqstanda lıftilerdiń biryńǵaı elektrondyq tizimin qurý usynyldy
ASTANA. QazAqparat - Parlament Senatynyń jalpy otyrysynda el aýmaǵyndaǵy lıftiler máselesi boıynsha QR Úkimetiniń basshysy Baqytjan Saǵyntevtyń atyna depýtattyq saýal joldandy, dep habarlaıdy QazAqparat.
«Depýtattyq saýal joldaýǵa aqaýly lıft saldarynan Aqtóbe qalasynda jas áıeldiń qaıǵyly qazaǵa ushyraýy sebep bolyp otyr. Ókinishke qaraı, mundaı jaǵdaı elimizdiń basqa qalalarynda da oryn alyp jatyr. Jańadan salynǵan turǵyn úı keshenderindegi lıftilerdiń de udaıy isten shyǵyp jatatyny tańǵaldyrmaıtyn boldy. Qazirgi tańda turǵyn úı kommýnaldyq-sharýashylyq nysandarynda bekitilgen lıftilerdi baqylaý jergilikti atqarýshy organdardyń quzyryna berilgen. Biraq is júzinde osy qalalyq turǵyn úı ınspektsııalaryna lıftilerdi tehnıkalyq kútip ustaý boıynsha baqylaý fýnktsııalaryn iske asyrý jónindegi ókilettikteri berilmegen. Nátıjesinde, lıftilerdi tehnıkalyq kútip ustaýdy júzege asyratyn kompanııalardyń qyzmeti baqylaýsyz qaldy. Olardyń qyzmetine qoıylatyn talaptar aıqyndalmaǵan. Lıft uıymdaryn sertıfıkattaý tetigi ázirlenbegen. Qazaqstan lıftishileriniń qaýymdastyǵy derekteri boıynsha elimizdiń iri 7 qalasynda jeti myńǵa jýyq lıft kúrdeli jańǵyrtýdy nemese aýystyrýdy qajet etedi», - dedi senator Marat Taǵymov
Onyń sózine qaraǵanda, Astananyń ózinde shamamen 60 servıstik kompanııa jumys isteıdi. Olardyń bolmashy bóliginiń ǵana shyn máninde quzyretteri, mamandary jáne qajetti óndiristik tehnologııa bazasy bar. Lıftilerdiń apattyq máselesi ártúrli ákimshilik deńgeılerde talqylanǵanymen, jaǵdaı ózgermedi.
Sonymen qatar, depýtat ónerkásiptik qaýipsizdik sapasyndaǵy ókiletti organ men jergilikti atqarýshy organdar arasynda lıft jabdyqtaryn baqylaýdy júzege asyrý jónindegi fýnktsııalardyń qaıtalanýyn bolǵyzbaý, sondaı-aq turǵyn úı ınspektsııa qyzmetkerlerine tıisti ókilettikteri bar memlekettik ınspektor mártebesin berý jóninde sharalar qabyldaýdy surady.
«Lıft qyzmetin kórsetýge arnalǵan biryńǵaı salalyq standartty, onyń ishinde lıftilerdiń biryńǵaı elektrondyq tizimin qurý týraly jáne saýalda kórsetilgen basqa da máselelerdiń sheshilýin qamtamasyz etýdi ótinemiz», - dep túıdi senator.
Budan buryn habarlanǵandaı, bıyl sáýir aıynyń basynda Elbasy Nursultan Nazarbaev eldegi lıftiler jumysyn tártipke keltirýdi talap etken bolatyn.
