Qazaqstanda lıftilerdi aýystyrý jumysy ákimdikterge júktelmek
«Lıftiler boıynsha aıtarym. Bul jerde biz eki joldy tańdadyq. Birinshiden, qazirgi ýaqytta lıft sharýashylyǵynyń jumysyn qadaǵalaýǵa arnalǵan 16 normatıvtik qujat bar. Lıft sharýashylyǵy qaýymdastyǵy jáne «Atameken» Ulttyq kásipkerler palatasymen birge jumys tobyn quryp, biryńǵaı standartty ázirlep shyǵardyq. Biryńǵaı standarttar lıftilerdiń qaısysyn sapaly dep tanyp, qandaı lıftilerdi Qazaqstanǵa ákelýge bolatynyn, lıftiler qalaı paıdalanylyp, qalaı jumys isteýi kerektigin aıqyndap beredi. Lıftiniń óndirisinen bastap, paıdalanylýyna deıin barlyǵy da sol standartta jazylǵan. Atalmysh standarttar tehnıkalyq retteý komıtetiniń saıtyna jarııalanyp, talqylaýǵa shyǵaryldy. Barlyq usynystar eskerilgennen keıin biz standarttardy bekitemiz», - dedi Úkimettiń baspasóz ortalyǵynda baspasóz máslıhatyn ótkizgen QR Investıtsııalar jáne damý vıtse-mınıstri Qaıyrbek Óskenbaev.
Onyń aıtýynsha, normatıvti turǵyda barlyǵy daıyn bolǵanymen, úı turǵyndary bir mezette aqsha jınap, lıftilerin aýystyrýǵa qarajat taba bermeıdi.
«Máselen, eger bes kireberisi bar úıdiń bes lıftin ózgertý kerek bolsa, bir lıftiniń quny shamamen 50 myń AQSh dollary. Demek, bes esikti bir úıge 250 myń AQSh dollary kerek degen sóz. Ony turǵyndarǵa tabý múmkin emes. Bul jerde birinshi kireberistiń lıftin bıyl, al besinshi kireberistikin bes jyldan keıin degen nusqa da bolmaıdy. Sebebi, bizdiń barlyq turǵyndar bir mezette qaýipsiz qyzmet alýy tıis. Sondyqtan, atalmysh zań jobasynda ákimniń quziretin arttyryp, olar bıýdjet qarajaty esebinen lıftilerdiń aýystyrylýyna qarjy bóle alatyndaı bólikti engizdik. Demek, normatıvti turǵyda standarttardyń barlyǵyn ázirledik. Zańnamalyq turǵyda lıftilerdi aýystyrý úshin úı turǵyndaryna salmaq salmaıtyndaı qarjylyq múmkindikterge jol ashyp otyrmyz», - dedi Qaıyrbek Óskenbaev.
