Qazaqstanda lıfti qyzmetin baqylaıtyn ulttyq standart ázirlendi

ASTANA. QazAqparat - Elimizde lıfti qyzmetine qatysty biryńǵaı talaptardy anyqtaıtyn ulttyq standart ázirlendi, dep habarlaıdy QazAqparat tilshisi.

«Lıftilerge qoıylatyn qaýipsizdik talaptary 2013 jylǵy 18 sáýirde qoldanysqa engizilgen EAEQ 011/2011 «Lıftilerdiń qaýipsizdigi» tehnıkalyq reglamenti sheńberinde belgilengen. Endi lıftini jetkizýdi, jóndeý men tehnıkalyq qyzmet kórsetýdi júzege asyratyn uıymdarǵa qoıylatyn talaptar ulttyq zańnamamen retteledi. Qazirgi ýaqytta QR lıft sharýashylyǵyn paıdalanatyn uıymdardyń qyzmetin túrli deńgeıde retteıtin shamamen 16 normatıvtik tehnıkalyq qujattar bar. Biz atalǵan normatıvtik qujattardy biriktirip, lıftilerdi jóndeý men qyzmet kórsetýdiń biryńǵaı talaptaryn anyqtaıtyn ulttyq standart ázirledik», - dedi QR Indýstrııa jáne ınfraqurylymdyq damý mınıstrligi Qurylys salasyn jáne turǵyn úı-kommýnaldyq sharýashylyǵyn damytý departamenti dırektorynyń orynbasary Marǵulan Ábdikárimov OKQ-de ótken baspasóz máslıhatynda.

Onyń aıtýynsha, 16 normatıvtik qujatty biriktiretin atalǵan ulttyq standart barlyq múddeli taraptarmen (memlekettik organdar, «Atameken» QR UKP, lıft óndirýshiler, salalyq odaqtar jáne t.b.) kelisildi.

«Turǵyn úı-kommýnaldyq sharýashylyǵy týraly jańa zań jobasy maquldanǵan jaǵdaıda kóppáterli úı ıeleri lıftini jóndeý nemese aýystyrý týraly sheshimdi ózderi qabyldaıdy. Biraq olardyń 100% kelisimi kerek, odan soń jobalyq-smetalyq qujattar ázirlenip, bekitilýge jiberiledi. Lıftini jóndeýge nemese aýystyrýǵa qajetti qarjy jergilikti bıýdjet esebinen júrgiziledi, al ony qaıtarý, turǵyndarmen 8 ben 15 jyl aralyǵynda biryńǵaı tólem qujaty arqyly júzege asatyn bolady», - dedi ol.

Aıta ketsek, qazirgi ýaqytta turǵyn úı-kommýnaldyq sharýashylyq salasy boıynsha jańa zań jobasy Parlament Májilisiniń qaraýynda.

Odan bólek, buǵan deıin atalǵan sala boıynsha biryńǵaı aqparattyq júıe qurylatynyn habarlaǵan bolatynbyz.