Qazaqstanda lıft qyzmeti jónindegi ulttyq standart barlyq kompanııalarǵa mindettelýi múmkin
ASTANA. QazAqparat - Qazaqstanda lıftilerdi paıdalaný jáne qyzmet kórsetý máseleleri jóninde jasalǵan ulttyq standart barlyq kompanııalarǵa mindetti bolýy múmkin, dep habarlaıdy QazAqparat.
Bul týraly «Qazaqstannyń standarttaý jáne sertıfıkattaý ınstıtýty RMK bas dırektorynyń orynbasary Erkejan Ámirhanova málimdedi.
«Lıft qaýipsizdigi týraly Eýrazııa ekonomıkalyq komıssııasynyń tehnıkalyq reglamenti lıftini daıyndaý men montajdaý máselelerin retteıdi. Bul reglament EAEO-nyń 5 memleketinde kúshine ıe. Sonymen birge, lıftilerdi qoldanýǵa qatysty máseleler óte kóp. Sebebi, óndiris pen qoldaný uǵymdaryn bólip-jaryp qaraýǵa bolmaıdy. Sondyqtan, atalǵan tehnıkalyq reglamentti júzege asyrý úshin lıftti paıdalaný jáne qyzmet kórsetý máselelerin retteıtin Ulttyq standart jasaldy», - dedi E. Ámirhanova ınstıtýtta ótken semınarda jýrnalısterge bergen suhbatynda.
Onyń aıtýynsha, lıft qaýipsizdigi týraly EAEO-nyń tehnıkalyq reglamenti men ulttyq standart ótken jyldyń jeltoqsan aıynda kúshine engen. Alaıda, bul standart barlyq kompanııalar úshin mindettelmegen. Sondyqtan, ınstıtýt ókilderi lıftilerdi qoldaný máseleleri boıynsha Ulttyq standartty zańnamalyq deńgeıde engizýdi kózdep otyr.
«Qazaqstanda lıftilerdi qoldaný máseleleri boıynsha Ulttyq standartty barlyq kompanııalarǵa mindettegimiz keledi. Biz ony «Azamattyq qorǵanys» jáne «Turǵyn úı-kommýnaldyq sharýashylyǵy týraly» QR Zańdary aıasynda usynyp otyrmyz. Odan bólek, ákimdikterge bul standartty lıft qyzmetiniń durys kórsetilýi úshin jergilikti atqarý organdarynyń aktileri aıasynda qoldanýdy usynamyz», - dedi Erkejan Ámirhanova.
