Qazaqstanda LGBT nasıhatqa qylmystyq jaýapkershilik engizý usynyldy
ASTANA. KAZINFORM — Májilis depýtaty Edil Jańbyrshın LGBT-ny ashyq jáne janama jolmen nasıhattaǵan adamdardy qylmystyq jazaǵa tartýdy usyndy.
— LGBT nasıhatqa zańmen tyıym salý kerek. Bul árkimniń jeke máselesi, ony aqparat quraldary, áleýmettik jeli arqyly nasıhattaýǵa bolmaıdy. Bir top depýtat LGBT nasıhatyna qarsy normany ázirlep bergenbiz, biraq, ótpeı qaldy, jan-jaqtan qarsylyq boldy. Sol sebepti petıtsııa paıda boldy. Halyq qoldap, komıssııa qurylyp, ǵalymdar, sarapshylar zerttep bunyń zııan ekenin kórip otyrmyz, — dedi Edil Jańbyrshın BAQ ókilderiniń saýalyna jaýap bere turyp.
Odan ári halyq qalaýlysy LGBT nasıhatqa jaýapkershilik engizý máselesin kóterdi.
— Biz tek qana tyıym salyp qoımaýymyz kerek, eger tyıymdy buzyp áleýmettik jelide nemese BAQ-ta jáne basqa janama jolmen jarnamalaıtyn bolsa, oǵan ákimshilik jaýapkershilik qana emes, qylmystyq jaýapkershilik qarastyrylýy kerek dep oılaımyn, — deıdi Edil Jańbyrshın.
Aıta keteıik, búgin elordada LGBT nasıhattyń balalar men jasóspirimderge áserin zertteý nátıjesi talqylandy. Atalǵan sharaǵa sarapshylar, ǵalymdar, memlekettik organdar ókilderi, depýtattar men qoǵamdyq uıymdar ókilderi qatysty.
Aıta ketsek, Prezıdent Qasym-Jomart Toqaev Ulttyq quryltaıdyń ІV otyrysynda LGBT-ǵa qatysty paıym aıtty.
Májilis depýtaty Edil Jańbyrshın buǵan deıin LGBT ókilderin jazalaý máselesin kótergen edi.
Eske salaıyq, byltyr 1 tamyzda «Qazaqstan Respýblıkasynda LGBT-ny ashyq jáne jasyryn túrde nasıhattaýǵa qarsymyz!» petıtsııasy boıynsha sheshim jobasyna jarııa talqylaý ótti.