Qazaqstanda lańkestik áreketke qatysqandardyń eń jasy 17-de, eń úlkeni 48 jasta bolǵan - Zertteý nátıjeleri
ASTANA. QazAqparat - Qazaqstandaǵy terrorıstiń eń jasy 17-de, eń úlkeni 48 jasta bolǵan. Búgin Astanadaǵy QR Prezıdenti janyndaǵy Ortalyq kommýnıkatsııalar qyzmetindegi brıfıng barysynda ekstremızm men terrorızmge qarsy is-áreket jónindegi zertteýler nátıjesi týraly baıandaǵan saıasattanýshy Erlan Qarın osylaı aıtty.
Qazaqstandaǵy ekstremızm men terrorızm qaýpine qatysty zertteý ótken jyldyń qarasha aıynan bastap aǵymdaǵy jylǵy 16 naýryzǵa deıin respýblıka boıynsha júrgizilgen. Zertteý nysanyna 227 adam qamtyldy. Olardyń 150-i sottalǵandar. Budan bólek, terrorıstik qylmystar boıynsha qozǵalǵan qylmystyq isterde attary atalatyn 77 tulǵa da zertteýge ilingen. Zertteý barysynda sarapshylar qylmystyq isterde aıtylǵan tulǵalardyń basym bóligine taldaý jasady.
«Belgili bolǵanyndaı, Qazaqstandaǵy terrorıstik qylmystarǵa qatysty tergeýge tartylǵandardyń 55 paıyzy 17-29 jastaǵylardy qurap otyr. Olardyń 36 paıyzy 25 jasqa tolmaǵan bolsa, 35 paıyzynyń jasy 30-39 aralyǵynda. Terrorıstik qylmystar jasalǵan ýaqytta top músheleriniń eń jasy 17-de, eń úlkeni 48 jasta bolǵan», - deıdi E. Qarın.
Onyń sózine qaraǵanda, lańkestik top músheleriniń 56-synda orta bilim bitirgendigi týraly attestat qana bolǵan. Al «terrorızm» babymen sottalǵannyń biri orta mekteptiń 4 synybyn ǵana bitiripti. Sonymen qatar, terrorıstik top músheleriniń úshten biri arnaýly orta (16 paıyzy) jáne joǵary (18 paıyzy) bilim ıeleri eken jáne olardyń tek 6 paıyzy arnaıy dinı mekemelerde saýat alǵan.
«Radıkaldy terrorıstik topqa tartylǵandardyń basym bóliginde arnaıy dinı saýattyń bolmaǵanyn osydan-aq kóremiz. Tipti, olardyń basym bóliginde bul salada tolyq túsinik te qalyptaspaǵan», - dedi E. Qarın.
Budan bólek, zertteý málimetterine qaraǵanda, terrorıstik toptarǵa qatysýshylardyń basym bóligi, naqtyraq aıtqanda 73 paıyzy jumyssyzdar bolsa, turaqty jumysy barlar 26 paıyzdy qurapty.
