Qazaqstanda qyzylshaǵa shaldyqqandardyń 55 paıyzy - jastar

NUR-SULTAN. QazAqparat - Qazaqstanda qyzylshaǵa shaldyqqan eresekterdiń 55 paıyzdan astamyn 20-29 jas aralyǵyndaǵy azamattar quraıdy. Bul týraly Úkimet otyrysynda QR Densaýlyq saqtaý mınıstriniń mindetin atqarýshy Lázzat Aqtaeva aıtty, dep habarlaıdy QazAqparat tilshisi.

«2020 jyldyń bes aıynda 2019 jyldyń osyndaı kezeńimen salystyrǵanda qyzylshamen syrqattanýshylyqtyń 2,8 ese tómendeýine qol jetkizildi. Bul maqsatta 9-10 aılyq balalarǵa qosymsha vaktsınatsııa júrgizildi. 260 myńnan astam bala egildi. Bul, osy jas tobyndaǵy syrqattanýshylyqty 2,5 ese tómendetýge múmkindik berdi. Budan basqa, aýyrǵan eresekter arasynda 55 paıyzdan astamy 20-29 jas aralyǵyndaǵy top ekenin eskere otyryp, osy jas tobyna qyzylshaǵa qarsy qosymsha vaktsınatsııa júrgizildi, 1 759 459 adam egildi»,- dedi LázzatAqtaeva.

Onyń atap ótýinshe, elimizde menıngıtke shaldyǵý azaıdy.

«Qazaqstan Respýblıkasynda menıngokokk ınfektsııasymen syrqattanýshylyqtyń ortasha kóp jyldyq deńgeıiniń kórsetkishi 100 myń turǵynǵa shaqqanda 2,1-di quraıdy. Bul rette, qazirgi ýaqytta Qazaqstanda syrqattanýshylyq deńgeıi 100 myń turǵynǵa shaqqanda 0,15-ti qurap otyr. Bul shekti deńgeıden 14 ese tómen. Jyldyń ótken kezeńinde syrqattanýshylyq ótken jyldyń osyndaı kezeńimen salystyrǵanda sol deńgeıde saqtalyp otyr. Sonymen birge Shymkent qalasynda aýrý sanynyń 2-den 6 jaǵdaıǵa deıin ulǵaıǵany baıqalady», - dedi ol.