Qazaqstanda qyzylshaǵa qarsy vaktsına barlyq normatıvterge sáıkes keledi

ASTANA. QazAqparat - Qazaqstanda jasóspirimderdi ımmýndaýǵa qoldanylatyn qyzylshaǵa qarsy monovaktsına barlyq normatıvtik talaptarǵa saı keledi. Dárilik zattardy, medıtsınalyq maqsattaǵy buıymdardy jáne medıtsınalyq tehnıkalardy saraptaý ulttyq ortalyǵynyń mamandary osyndaı qorytyndy jasady.

«Osy ortalyqtyń málimetteri boıynsha, Serum Institute of India (Úndistan) óndirgen qyzylshaǵa qarsy monovaktsınanyń eritkishpen qosa 16 fızıkalyq-hımııalyq jáne bıologııalyq kórsetkishteri boıynsha synaqtan ótti. Synaq qorytyndylary normatıvtik qujat talaptaryna saı ekenin kórsetti», - delingen QR Densaýlyq saqtaý jáne áleýmettik damý mınıstrliginiń málimetinde.

Sondaı-aq, «aýytqyma ýyttylyǵyna», «bakterıaldyq endotoksınderge» jáne «zararsyzdyǵyna» synaqtar ótkizildi. Joǵaryda kórsetilgen barlyq kórsetkishter boıynsha vaktsınanyń sapasy normatıvtik qujattardyń talaptaryna saı keledi.

«Vaktsınatsııadan keıin jasóspirimder arasynda tirkelgen qolaısyz kórinisterdiń sebepterin zertteý qorytyndylary quramyna QR Ulttyq ekonomıka mınıstrliginiń Tutynýshylardyń quqyqtaryn qorǵaý komıteti, respýblıkalyq medıtsınalyq ortalyqtar, Dúnıejúzilik densaýlyq saqtaý uıymynyń Qazaqstandaǵy keńsesiniń ókilderi kirgen vedomstvoaralyq jumys toby júrgizgen barlyq tekserýlerdiń nátıjeleri boıynsha aǵymdaǵy jylǵy mamyr aıynda jarııalanady»,-dep atap ótilgen habarlamada.

Buǵan deıin habarlanǵandaı, búkil álemdegi qyzylshamen syrqattanýshylyq boıynsha kúrdeli epıdemıologııalyq jaǵdaı eskerilip, QR Bas memlekettik sanıtarlyq dárigeriniń 2015 jylǵy 15 qańtardaǵy qaýlysymen 15 jáne 19 jas aralyǵyndaǵylar qyzylshaǵa qarsy qosymsha ımmýnızatsııalaý týraly sheshim qabyldanǵan.

Immýnızatsııalaý barysynda respýblıkanyń 5 oblysynda qyzylshaǵa qarsy vaktsınatsııalaýdan keıin jasóspirimderden 399 ótinish tirkeldi. Jasóspirimderdiń 264-i aýrýhanaǵa jatqyzyldy, búginde olardyń barlyǵy emdelip shyqty. Egilgenderdiń jalpy sanynyń (529 myń 422 adam) ishinen ótinishterdiń salystyrmaly salmaǵy 0,07 paıyzdy qurady, al Dúnıejúzilik densaýlyq saqtaý uıymynyń (DDSU) málimetteri boıynsha 15 paıyzǵa deıin jol beriledi.

Aıta keteıik, QR Bas memlekettik sanıtarlyq dárigeriniń aǵymdaǵy jylǵy 19 aqpandaǵy qaýlysymen qyzylshaǵa qarsy qosymsha ımmýnızatsııalaý toqtatylyp, aǵymdaǵy jylǵy 2 naýryzdaǵy qaýlysymen ol 2015 jylǵy 4 mamyrǵa deıin uzartyldy.

Qazaqstanda qosymsha ımmýnızatsııalaýdyń sońǵy naýqany 10 jyl buryn (2005-2006 jyldary) ótkizilip, elimizde qyzylshamen naýqastaný kórsetkishin júzdegen esege tómendetýge (16 myńnan 13 jaǵdaıǵa deıin) múmkindik berdi.