Qazaqstanda qyzylshaǵa qarsy ımmýndaý júrgizilýi tıis jasóspirimderdiń 74 paıyzdan astamyna ekpe jasaldy

ASTANA. QazAqparat - Aǵymdaǵy jyldyń 13 qazanyndaǵy jaǵdaı boıynsha qyzylshaǵa qarsy ımmýndaý júrgizilýi tıis 15-19 jas aralyǵyndaǵy jasóspirimder men jastardyń (316 myń 704 jasóspirim) 74,3 paıyzyna (235 myń 164 adam) vaktsına egildi.

«Aqtóbe jáne Batys Qazaqstan oblystarynda qyzylshaǵa qarsy qosymsha ımmýndaý kampanııasy 100 paıyz ekpe júrgizip boldy. Aqmola, Atyraý, Qyzylorda oblystary men Almaty qalasynda 90 paıyzdan astam adam vaktsınatsııalandy. Ózge 10 aımaqta (Almaty, Shyǵys Qazaqstan, Qaraǵandy, Qostanaı, Pavlodar, Soltústik Qazaqstan, Ońtústik Qazaqstan oblystary men Astana qalasy) vaktsınamen qamtý kórsetkishi 50-den 80 paıyzǵa deıingi kórsetkishti quraıdy», - dep habarlady QR Densaýlyq saqtaý jáne áleýmettik damý mınıstrliginen.

Immýndaý sharalaryn júzege asyrý barysynda jaǵymsyz jaǵdaılar tirkelgen joq.

Esterińizge sala keteıik, Qazaqstanda aǵymdaǵy jyldyń 1 qazanynan bastap 15-19 jas aralyǵyndaǵy jasóspirimderdi qyzylshaǵa qarsy qosymsha ımmýndaý jumystary júrgizilýde.