Qazaqstanda qyzylsha aýrýynyń deńgeıi 36 esege tómendedi

ASTANA. QazAqparat - Halyqty vaktsınalaý sharalary nátıjesinde Qazaqstanda qyzylshamen syrqattanýdyń kórsetkishi aǵymdaǵy jyldyń 2 aıynda ótken jylǵy sáıkes kezeńmen salystyrǵanda 36 esege tómendedi (2015 jylǵy 2 aıda 705 jaǵdaı, 2016 jylǵy 2 aıda 20 jaǵdaı), dep habarlaıdy QR DSÁDM baspasóz qyzmeti.

QR Densaýlyq saqtaý jáne áleýmettik damý mınıstrligi halyqty vaktsınalaýmen qajetti deńgeıde qamtamasyz etý maqsatynda QR-da qyzylshaǵa qarsy qosymsha ımmýndaý kampanııasyn ótkizýge arnalǵan Áleýmettik mobılızatsııalaý men aqparattyq jumystar josparyn bekitken bolatyn. Barlyq oblystar men Astana, Almaty qalalary ákimderi orynbasarlarynyń basshylyǵymen ótetin qyzylshaǵa qarsy qosymsha ımmýndaý sharalaryn úılestirý maqsatynda árbir aımaqta shtabtar quryldy. Vaktsınany tasymaldaý men saqtaý sharalary muqııat tekserildi. Jasóspirimder jáne olardyń ata-analarymen vaktsınalaýdy júrgizýdiń qajettigi týraly túsindirý jumystary júrgizildi.

Qyzylshaǵa qarsy ımmýndaý kompanııasynyń birinshi kezeńinde 529 myń 422 jasóspirim (60,1%-dan asa), ekinshi kezeńinde 292 myń 113 adam nemese maqsatty toptyń jalpy sanynyń 92,1%-y (316 myń 704 jasóspirim) qamtyldy.